Gasolinahan gitulis sa tulo ka nagmotor

Tulo ka mga nagmotorsiklong tulisan ang misakiyo sa 10 mil pesos cash  sa usa ka gasoline station nga nahimutang   sa dalan Natalio Bacalso barangay Mambaling human gitulis mga ala 1:35 sa kaadlawon kagahapon.

Si PO2 Bestilio Dabatos, desk officer sa Mambaling Police Station nga gikahinabi sa Banat News nitug-an nga ang Sams Petron Gasoline Station maoy gibiktima nga gipanag-iya  ni Anunciacion Dy.

Matud pa niini nga ang tulo ka mga tulisan luwan  sa usa ka XRM nga motorsiklo ug gitiunan ug gidis-armahan sa iyang shot-gun ang gwardiya nga si Quirano Vallerta.

Samtang ang laing suspetsado nition usab sa iyang armas ngadto sa cashier  ug nagkanayon “dali dong tulis ni ang kwarta pagdali patyon tika ron”.

Ang tulo ka mga tulisan gihulagway nga usa niini nagdalag revolver way helmet  nga nagsul-ob og polo nga yellow, nag-short og maong, dakuon og lawas nagpangidaron og 30-35 anyos, 5”6 ang gitas-on samtang ang ikaduha nagsul-ob og helmet, puti ang  t- shirt naka maong ang short nagdalag pistola nagpangidaron og 20-25 anyos  ug ang ikatulo nag helmet nagsul-ob og dirty white nga polo medium built nagdala'g pistola ug nagpangidaron sa 20-25 anyos, 5”4 ang gitas-on.

Ang tulo dali kaayong nakasibat human sa pagpanulis nga  mipasutoy sa pagpadagan padulong sa habagatang bahin sa Sugbu.