Fernandez rob gang ang nitulis

Grupo ni Roy Fernandez maoy responsable sa pagpanulis niadtong milabay’ng Biyernes sa gabii sa usa ka money changer diha sulod sa usa ka mall ning dakbayan.

Kini maoy gitataw ni Supt. Paul Labra II ang Deputy City Director for Administration sa Cebu City Police Office atol sa pag-atubang niini sa mga sakop sa media kagahapon.

Si Labra nagkanayon nga si Fernandez ug ang laing tulo ka kauban niini ila nang nailhan apan dili una nila ibutyag kun si kinsa ang mga pangalan sa tulo apan iyang gipasabot nga sagad sa sakop sa maong tulisan nagagikan sa Bohol.

Ang mga suspetsado naila pinaagi sa pagpakita sa rogue gallery sa Theft and Robbery Section ingon man sa CCTV Camera sa mall diin nakita usab nga si Fernandez maoy nangunay sa pagkuha sa kwarta gikan sa bag.

Sumala pa niini nga si Fernandez ug ang driver niini naila nga taga Manila kinsa adunay kaso nga illegal possession of fire arms.

Giklaro niini nga ilang paninguhaon nga mapasaka ang kaso karong semanaha kini kun makumpleto na ang mga dokumento.

Nagtuo usab siya nga aduna kiniy mga local contacts ang mga suspetsado diin sagad gyud nga mahitabo kun adunay mga sama niining kaso sa tulis.

Dugang niini nga si Fernandez adunay standing warrant of arrest sa kasong kidnapping didto sa kauluhan hinungdan nga mamahimo nilang dakpon bisan unsang orasa basta makit-an.

Samtang ilang gitinguha karon ang pag-rekomendar nga mabutang kini sa most wanted list person ingon man paghatag og reward batok kang Fernandez.

Si Fernandez naila kini nga kanhi sakop sa bangiitang grupo sa mga tulisan nga mao ang Kuratong Baleleng Gang.

Nasayran nga mokabat sa P400,000 mil nga salapi ang nadala sa maong mga tulisan human ilang gitulis ang X-Change Moneychanger diha sa lower ground floor sa maong mall

Samtang si Sr. Inspector Michael Bastes ang hepe sa TRS mikunpirma nga ang Cherubin Security Agency   mohatag og P100,000 nga reward money.