Nalagpot gikan sa flyover ilhan na apan patay

Namatay ang backrider sa motorsiklo nga nalabay ug mitugpa sa sementadong dalan sa miaging kaadlawon sa dalan  ubos sa flyover sa Maguikay sa dakbayan sa Mandaue.

Kini ang nasayran kang Saromines sa follow-up nga gihimo sa Banat News kagahapon sa buntag.

Ang biktima nga wala gilayon maila sa kapolisan mao si Alvin Mercader, 17,  nga taga North Road, Reclamation Area sa dakbayan sa Sugbo.

Si Claudio Mercader, 30, nga maoy  uyoan ang nag-ila kang Alvin nga naghimo'g pakisusi sa buhatan sa traffic section sa Mandaue City Police Office (MCPO) kagahapon sa buntag.

Subay sa giasoy sa uyoan ngadto kang SPO1 Eleazar sa Saromines nasayran nga namatay si Alvin sa Vicente Sotto Memorial Medical Center sa dakbayan sa Sugbo pipila ka oras nga nahidangat sa maong tambalanan.

Sumala pa sa uyoan nga truckboy ni Brendo Ycot sa gitrabahoan niining Lite Year Trucking si Alvin nga nagbase usab sa reclamation area sa dakbayan sa Sugbo.

Dugang pa niya nga nagpaingon sa pagpauli sa barangay Busogon sa lungsod sa San Remegio si Brendo Ycot ug gipakuyog ang iyang pag-umangkon.

Sa ilang paghidangat sa tungatungang  bahin sa flyover sa Maguikay  nasugatan  nila ang delivery  van ug kalit nga nagkasungag nga maoy nakaingon sa ilang hinanaling kamatayon.