Duha ka polis gisuspenso

Duha ka mga polis Regional Mobile Group sa Sibonga ang gimandong masuspenso og 31 ka adlaw samtang ang usa 41 ka adlaw human sila makapakita og igong rason sa ilang wala pagsunod sa Physical Fitness Test nga tinuig nga gipahigayon sa PNP.

Ang gisuspenso subay sa kamandoan ni Sr. Supt. Vicente Loot sa Regional Human Resource Development Division sa Police Regional Office –7 nga giuyonan usab ni Chief Supt. Ronald Roderos.

Ang gisuspenso og 31 ka adlaw mao si PO1 Ariel Cuarto samtang si PO1 Meljun Lastimoso gimandong masuspenso usab og 41 ka adlaw, ang duha pulos dili makadawat sa ilang suhulan sa maong mga adlaw.

Sumala pa sa desisyong giluwatan ni Loot ang pagsuspenso kanila mahitungod sa kasong administratiba nga less grave neglect of duty ug ang suspension magsugod karong Mayo uno ngadto sa ika-31 kang Cuarto ug Mayo uno ngadto sa Hunyo 10 ang kang Lastimoso.

Gimando usab nga human nila maserbisyuhi ang ilang suspension awtomatikong mabalik ang ilang status isip mga sakop sa PNP ug mamahimo nang mobalik sa ilang trabaho.

Sa laing bahin, duna nay gitudlong summary hearing officer aron sugdan og paminaw ang kasong administratiba batok kang PO1 Eva Caminade nga sakop sa Fuente Police Station sa Cebu City Police nga nasayop og buhi sa usa ka dinakpan pipila na ka bulan ang nakalabay.

Ang gitudlong summary hearing officer ni Loot mao si Insp. Joseph Cañete tungod sa kasong administrative gihapon nga less grave neglect of duties dihang nasipyat si Caminade nga mabuhian ang dinakpan sa Regional Investigation Division nga usa ka drug pusher atol sa buy-bust operation. Hinuon ang maong nasaypang nabuhian nadakpan na pag-usab.(Edwin Ian Melecio)