Lalaki gipusil og kadaghan, patay

Gideklarar nga patay na nga nahidangat sa Cebu City Medical Center (CCMC) ang usa ka 44 anyos nga lalaki human mabiktima sa pagpamusil kagahapon sa alas 5:05 sa kaadlawon diha sa New Road Imus, barangay Lorega San Miguel ning dakbayan.

Ang namatay gumikan sa mga samad pinusilan sa iyang dughan, tiyan, ug tuong tiil giila sa kapolisan nga si Danny Magallanes,  walay trabaho ug residente sa Sitio San Roque sa nahisgutang barangay.

Samtang ang wala mailhing mamumuno gihulagway nga 5”2 ngadto  sa 5”5 ang gitas-on, nagsul-ob sa itom nga leather jacket, naka T-shirt ug puti nga nagkarsones nga sakay sa usa ka XRM  nga motorsiklo.

Sa imbestigasyon nila ni SPO4 Alex Dacua ug mga kaubanan sa Homicide Section sa Cebu City Police Office,  ang biktima naglingkod sa sementadong lingkuranan daplin sa dalan sa nahisgutang dapit sa dihang ang  mamumuno niabot sakay sa motorsiklo ug mihunong duol sa biktima dayon pusil makadaghang higayon.

Human sa pagpamusil daling mipasirit sa motorsiklo paingon sa barangay Day-as samtang ang biktima gidali sa pagdala sa CCMC nga gideklarar nga dead-on-arrival.

Ang mga sakop sa Mobile Patrol Group car 007 nga maoy unang nakaresponde sa maong pagpamusil nakakuha  og upat ka mga kabhang sa bala sa .9mm   didto sa crime scene.