Nagpuyo sikop sa search warrant

Nadakpan ang giilang shabu king ug kapuyo nga babaye sa sitio Grancena sa barangay Opao, dakbayan sa Mandaue sa gihimong pagpangronda sa kapolisan sa dakbayan sa Mandaue sa miaging gabii.

Ang nadakpan mao si Enriquito Baunsit, 49 anyos ug ang kapuyo nga si Lailane Samonte, 50 anyos nga pulos nagpuyo sa maong dapit.

Si Senior Inspector Gualberto Gavales maoy nangulo sa maong pagpangronda nga gibase sa search warrant nga giluwatan ni Judge Teresita Galanida sa municipal trial court nga nagbase sa maong dakbayan.

Si PO2 Rogen Pudotan nga nahinabi sa Banat News miingon nga gawas  sa pagkasikop nila ni Baunsit ug Samonte nasakmit usab nila ang lima ka plastik nga gisudlan og shabu, salapi nga mokabat sa P4,000 ug uban pa.

Matud pa ni Pudoton nga si Baunsit ang nadakpan na nila kaniadto sa kalapasan nga RA 6425 kun  ilegal gihapon nga paghupot ug pagpamaliya  og shabu nga giamendar  na karon nga RA 9165 kun Comprehensive Dangerous Drug Act of 2002.

Nabalhog na sa bilanggoan kaniadto ang maong suspetsado apan nakagawas kini human makabutang og piyansa apan mibalik gihapon kini sa ilegal nga kalihokan nga maoy hinungdan nga subli na usab kini nilang nadakpan.