Hepe sa polis gireklamo

Hepe ug laing polis sa traffic division sa dakbayan sa Talisay ang gireklamo sa usa ka drayber tungod kay gidakop siya sa duha bisan pa og aduna siya’y permit gikan kang Konsehal Sabeniano Abatayo ug noted usab kini sa mayor nga pwede siyang makaparada sa ilang sakyanan diha sa atubangan sa ilang establisamento sa barangay Tabunok.

Ang insidente nahitabo niadtong Huwebes sa alas 12:45 sa hapon diha sa nahisgutang barangay.

Si Jiger Tagab Tee, 33-anyos, checker/driver sa Alfyn Marketing nga nahimutang sa sitio Sangi, Tabunok ang mitaho sa kapolisan diha sa barangay Poblacion kabahin sa maong hitabo.

Base sa imbestigasyon sa mga polis nga si Jiger ang miparada sa ilang trak atubangan sa establisamento tungod kay naghabwa kini og mga bugas nga sinako.

Si Police Senior Inspector Arceliano Bañares, hepe sa traffic division ug PO2 Lino Diez ang miduol ngadto kaniya ug mimando nga itunol ang iyang lisensiya.

Giangkon ni Tee nga nagdumili siya sa paghatag sa iyang lisensiya apan gipasabot siya sa mga polis nga tan-awon lang ang iyang lisensiya apan dihang iyaha kini gikuha gikan sa iyang pitaka dali usab kining gikuha ni Bañares gikan sa iyang kamot ug gidunol ngadto kang Diez kinsa giingong nagsul-ob lang og puti nga short pants ug t-shirt.

Si Tee ang giisyuhan sa maong mga polis og Temporary Operator’s Permit Receipt (TOP).

Si Tee ang mipasabot ngadto sa mga polis nga gihatagan siya og permit ni Abatayo ug noted usab kini sa mayor nga pwede siyang makaparada sa sakyanan diha sa atubangan sa ilang establisamento gikan sa alas 12:00 sa udto hangtod sa alas 3:00 sa hapon.

Base sa blotter sa polis gipabasa ni Tee sa duha ka polis ang memorandum sa permit nga gihatag ni Abatayo ngadto kaniya apan ang maong mga polis padayon gihapon sa pag-isyu kaniya og TOP ug gipapirma siya niini.

Apan si Tee nagdumili sa pagpirma ug nagkanayon nga iyaha unang pahibaw-on ang iyang ig-agaw kinsa diha sa iyang buhatan sa establisamento niadtong higayona apan pagbalik pa ni Tee wala na ang maong mga polis ug wala usab siya mahatagi og TOP ilis sa iyang lisensiya nga gisikop.

Si Bañares sa pakighinabi niini sa Banat News kagahapon sa hapon mipasangil nga walay gipakitang permit si Tee ngadto kanila hinungdan nga ilaha gyud kining gisikop tungod kay nakalapas kini sa trapiko.

Ang hepe sa traffic division ang mipasangil nga arogante kaayo si Tee ug dili gustong magpasikop kanila.