CITOM dismayado sa imbestigasyon sa gipatay nga sakop

Dismayado ang Cebu City Traffic Operations and Management (Citom) sa kapulisan sa dakbayan sa Mandaue tungod kay giingong hangtud karon, wala kini kalambuan sa kaso labot sa pagpatay sa usa ka Citom personnel nga si Romeo Muñez.

Ang nahisgutang traffic enforcer gipusil-patay niadtong Abril 2 sa miaging tuig diha sa barangay Looc sa siyudad sa Mandaue.

Gikataho nga may kalabutan sa trabaho ang kamatayon ni Muñez tungod kay kini giingong kusog manakop sa mga driver nga makalapas sa mga lagda sa trapiko.

Sumala sa mga nakasaksi  nga nagmotorsiklo og pula nga Aura ang suspetsado, nakamaong og pantalon ug maroon nga t-shirt ang gisul-ob niini.

Giingon usab nga niwangon ang mamumuno, anaa sa 5’5” ang gitas-on, mubo ang buhok niini ug tabunon ang pamanit.

Apan matod ni  Konsehal Jack Jakosalem kinsa sakop usab sa Citom board nga gawas niini wala nay dugang kalambuan nga gihatag kanila ang kapulisan sa siyudad sa Mandaue.

“Sige mi og pangayo og update sa kaso ngadto sa Mandaue police, pero wala man gyod silay ikahatag nga kalambuan,” nagkanayon ang konsehal.

Tungod niini, ang Citom nakahukom pagdangop ngadto sa National Bureau of Investigation (NBI-7) ug kini na maoy ilang gipaimbistigar sa maong kaso.