Vendors sa SB Terminal papahawaon

Gitambagan ni Capitol Security Consultant Byron Garcia ang mga stall owners sulod sa  Cebu South bus terminal nga mangita nalang og laing lugar alang sa ilang mga negosyo.

Matud ni Garcia nga nakadesisyon na ang Kapitolyo nga wagtangon na ang mga stalls sa nahisgutang terminal sugod karung Hunyo Uno tungod kay ila namang himoan og passenger lounge.

Kini aron hamugaway na ang kahimtang sa mga pasahero nga mag-standby sulod sa terminal samtang naghuwat sa mga buses nga ilang kasakyan pauli sa tagsa-tagsa nila ka mga lungsod sa tibuok lalawigan.

Miingon si Garcia nga butangan niya og aircon ang passenger lounge  sa  Cebu South bus terminal aron komportable ang mga pasahero ingon man dili usab sila panington panahon sa ting-init samtang wala pay niabot nga mga buses.

Gawas niini, duna na usab X-ray machine nga  ibutang sa entrance aron masusi ang mga bag ug mga bagahe.

Duna nay dul-an sa napulo ka  stall owners ang hinay-hinay nang nibiya sulod sa maong terminal human makahibalo nga bungkagon na ang mga stall sugod karung bulan sa Hunyo gumikan sa maong plano sa Kapitolyo.

Samtang hugot usab nga gipatuman sa mga gwardya ang seguridad sulod sa maong terminal.