Samtang nagpaabot nga mapasar ang balaodnon nga mopabarato sa mga tambal, si Sen. Manuel Roxas II miawhag sa kagamhanang nasyonal sa pagbuhi og pundo nga P1 bilyon alang sa pag-import og barato apan kalidad nga mga tambal gikan sa India.
Si Roxas, kinsa maoy author sa Senate version sa Cheap Medicine Bill, nagkanayon nga gikinahanglan niining panahona nga molihok ang gobyerno aron luwason ang kalisud sa katawhan pag-angkon og tambal nga maabot sa ilang bulsa, ilabi na karon nga nagmahal ang palaliton.
Gitataw ni Roxas nga ang mga Pilipino nagkinahanglan og tambal alang sa hypertension ug diabetes, ang kasagarang mga sakit nga giantos, apan naglisud sa pagpalit sa tambal niini tungod sa kamahal dinhi.
Gibutyag niya nga ang tambal nga Plendil dinhi sa nasud mapalit og P21.82, apan P2.69 lamang didto sa India, samtang ang Norvasc sa tag-P39.07, samtang P5.77 sa India.
Sumala pa ni Roxas nga ang mga “life-saving” nga mga tambal sama sa Plendil ug Norvasc maoy labing gikinahanglan karon sa nasud, ilabi na nga ang mga Pilipino, sumala sa pagtuon, nag-antus sa sakit nga hypertension ug diabetes.
“Parallel importation of live-saving medicines would benefit millions of ailing Filipino. This is one way of giving back to the people what the government collects by way of taxes,” si Roxas nagkanayon.
Ubos unya sa bag-ong balaod, adunay price regulatory board nga maoy mo-monitor ug mo-regulate sa presyo sa tambal dinhi sa nasud, aron masilotan kadtong magpahimulos sa higayon pagpaburot sa presyo sa tambal. (Guam Logroño)