Gitinguha ni Kongresista Nerissa Soon-Ruiz ang dinaliang kasulbaran sa nasinating kakulian sa Mandaue City College (MCC) nga ubos sa pagdumala ni Dr. Paulus Marie Cañete nga pagbaton og edipisyo alang sa maong tunghaan.
Gitinguha karon ang paggamit sa 12 ka ektaryang luna nga gipanag-iya sa kagamhanan sa sitio Capasanan barangay Casili nga nahimutang duol usab sa Mandaue City School for the Arts.
Ang lain niyang tinguha mao ang paghimong sangang tulunghaan sa Cebu Normal University sanglit labing dali nga ikapatuman alang sa kasulbaran gawas sa paghimo nga state college pinaagi sa balaodnon nga iyang gipalabang sa kongreso.
Dugang niyang tinguha mao ang paghangyo kang Health Sec. Francisco Duque nga gamiton sa maong mga tinun-an isip temporaryo nilang classroom ang mga lawak sa tambalanan sa dakbayan nga molungtad og duha ka tuig.
Si Ruiz miingon nga si Senador Ramon “Bong” Revilla, Jr. kinsa mitanyag og P4 milyones nga salapi alang sa katukoran og edipisyo alang sa maong tunghaan hangyuon usab niya sa pagtukod og dugang pang mga lawak saringan.
Ang kongresista kinsa nagpakabana sa kahimtang sa gihangyo sa mga tinun-an nakapahigayon sa pagpabalhin kanila ngadto sa bakanteng lawak sa Eversly Child Sanitarium Hospital isip ilang mga lawak saringan.
Nakigtagbo kang Mayor Jonas Cortes ang mga magtutudlo niadtong miaging adlaw ug mipadayag usab ngadto kaniya nga ang mga tinun-an mahimong makabalhin sa ilang klase ngadto sa Mandaue City Sports and Cultural Complex sa dakbayan.
Si Cortes miingon nga andam niyang tabangan ang mga tinun-an sa ilang pagbalhin ngadto sa maong lugar sanglit ang edipisyo sa Ibabao Estancia nga ilang giukopar gigamit na man sa mga tinun-an sa National Science High School nga temporaryo usab nga gipahimutang sa edipisyo sa Don Gerardo Ouano National High School sa barangay Opao.