Examinees sa ANZ di na mokiha

Kadaghanan niadtong mga examinees nga mireklamo batok sa kadagkoan sa ANZ International tungod kay wala sila makasalmot pagkuha’g pasulit kaniadtong Sabado karon dili na modayon pagpasaka’g kaso.

Kwarenta na sa 72 ka examinees nga wala makasalmot sa pasulit ang giulian sa gibayad nila nga tag P8,640 matag usa atubangan mismo ni Regional Trial Court (RTC) Branch 6 Judge Ester Veloso kagahapon sa buntag.

Ang dinalian nga husay didto sa korte kagahapon magtuki unta sa Petition for Writ of Habeas Corpuz nga gipasaka ni Atty. Santiago Ortiz nga nagkwestyon sa pagsikop sa iyang kliyente nga si Mary Barimbao.

Si Barimbao maoy secretary sa ANZ International nga gidumala ni Anabelle Diez nga mao unta ang mopahigayon og pasulit alang sa International English Language Testing System ngadto sa mga complainants nga pulos mga propesyonal.

Ang maong pasulit gikinahanglan alang sa mga complainants aron sila makatrabaho didto sa gawas sa nasud, apan sa daku nila nga kahibulong wala sila pasalmota sa pasulit bisan og nakabayad na sila sa tag P8,640.

Kini maoy rason nga sila mismo ang midakop ni Barimbao ug ni Diez, uban sa pag-abag sa mga sakop sa PNP Criminal Investigation and Detection Group nga gipangulohan ni Supt. Rex Derilo.

Sa pagsugod sa husay kagahapon, gitataw sa kadagkoan sa CIDG nga gitanggong nila ang duha ka tagdumala sa ANZ International tungod sa reklamo sa daghang examinees nga mipirma kanila og pamahayag.

Matud ni Derilo nga may katungod sila nga motanggong sa maong mga opisyal sa ANZ International sulod sa 36 oras sa dili pa ipasaka ang kaso sa hukmanan.

Gipasabot ni Derilo nga ang 36 oras magsugod pag-ihap kaniadtong Lunes sa buntag tungod kay walay labot sa ihap sa reglamentary period of detention ang adlaw’ng Sabado ug Domingo.

Apan si Judge Veloso misukna kun duna bay posibilidad nga masulbad nga malinawon ang kaso pananglit mouli ang tagdumala sa ANZ International sa mga nabayad sa complainants.

Buot unta sa abogado sa ANZ International nga ang pag-uli sa kwarta adto himoa sa ila nga opisina, apan miinsister ang mga complainants nga adto kini himoa atubangan sa huwes.

Wala hinoon mahurot pagbayad ang 72 ka examinees nga wala makasalmot sa pasulit sanglit ang kwarta nga gidala nila ni Diez ug Barimbao alang ra sa 40 ka tawo.