Usa ka batan-on nga nagmotorsiklo nabanggaan sa Ceres bus hangtod mibangga sa punoan sa kahoy duol sa taytayan ug milahos og katagak sa riprap lahos didto sa sapa nga pito ngadto sa 10 ka tiil nga nahimutang sa National Highway, Poblacion, Barili, lalawigan sa Sugbo niadtong miaging adlaw.
Si PO2 William Beltran sa Barili Police Station sa dihang nahinabi sa Banat News miila sa biktima nga si Michael Amante, molupyo sa Bulacao, ning siyudad sa Sugbo.
Matud ni PO2 Beltran naabtan nila pagresponde sa lugar nga nabuak ang ulo sa biktima ingon man ang helmet niini dihang nabunal nga nag-una ang ulo sa riprap nga semento sa tiilan sa taytayan human kini matagak sakay sa iyang motorsiklo gikan sa pagbangga niini sa puno-an sa kahoy human madumboli sa Ceres bus.
Subay sa gihimong imbestigasyon sa kapolisan ang biktima sakay sa motorsiklo paingon dinhi sa dakbayan sa Sugbo nga nagsunod sa Ceres bus ug paghiabot sa maong lugar matud sa mga nakasaksi kalit kining mi-overtake.
Apan naatol nga dihay laing trak nga gikasugat napugos kini pagbalik sa iyang linya hinungdan nga nadumbolan sa nagsunod nga Ceres bus ug wala na maka-kontrol sa gimaneho niining motor hinungdan nga mibangga sa punoan sa kahoy nga tambis una pa natagak sa riprap sa tiilan sa taytayan. (Darrel A. Carumba)