Manager, staff sa ANZ gikiha

Pormal nang gipasakaan og kaso kagahapon sa hapon sa mga reklamante ang tagdumala ug office staff sa Australia New Zealand International nga giingong napakyas paghatag kanila sa serbisyong gisaad bugti sa ilang gibayad ngadto sa maong kompanya aron makakuha sa pasulit nga International English Language Training System.

Ang gikiha mao sila si Anabelle Diez ug ang office staff niini nga si Mary Ellen Flor Barimbao, 29, kinsa parehong gisikop sa mga reklamante niadtong Sabado sa buntag diha sa usa ka uptown hotel atol sa pagkuha na unta og eksaminasyon.

Ang Criminal Investigation and Detection Group-7 mao nay miabag sa mga reklamante dihang ilang gidakop ang duha ug mao na usab ang miandam sa kasong ipasaka.

Mipasangil ang 35 ka mga reklamante nga napakyas si Diez nga sila makakuha og pasulit sa IELTS bisan og sila nakabayad na og P8,640 matag usa hinungdan nga nabalaka silang hasta ang ilang pangempleyo sa gawas sa nasud maapektahan ug madelatar sanglit ang uban kanila lumargahay na sa sunod bulan ug ang IELTS nalang maoy ilang gipaabot.

Ang ANZ International usa sa mga accredited agencies sa International Development Program nga gitugutang makapangaylap og mga aplikante  kon kandidato pagkuha sa IELTS.

Apan giklaro usab ni Diez nga wala sila malambigit sa job placements kun pagpanawat og mga aplikante para abroad kundili para lang pagtabang nga makakuha og IELTS ang mga buot motrabaho sa gawas sa nasud nga nag-require og IELTS.

Tungod sa kapakyas ilang gikomprontase si Diez ug Barimbao tungod kay wala kini makahatag og igong rason hangtud nga ila kining gi-citizen’s arrest ug gi-turn-over nila ngadto sa mga sakop sa CIDG-7.

Matud pang Diez dihang gihinabi sa Banat News nga mopatawag unya sila og press conference kabahin sa maong insidente aron paghatag usab sa ilang habig.