Wala mabalaka si Mayor Jonas Cortes sa gitinguhang protesta sa mga tinun-an ug hangtod na ang pagpadangat ngadto sa Ombudsman Visayas nga maoy resulta sa iyang gihimong pag-take over sa edipisyo nga gi-okupar sa Mandaue City College sa Ibabao, Estancia.
Ang mayor sa iyang pamahayag ngadto sa mga tigbalita ang mipadayag nga legal ang iyang gihimo sanglit ang pag-ukopar sa National Science High School sa Don Gerardo National High School sa barangay Opao ang adunay kontrata ug ibalhin kini sa higayon nga gamiton na ang edipisyo.
Nunot usab sa maong pagbalhin sa science high school sa edipisyo sa Ibabao Estancia ang mga tinun-an sa Mandaue City College nga maoy nag-ukopar ang iyang gibalhin ngadto sa sports complex.
Gipaniguro ni Cortes ang pagtabang sa mga tinun-an pinaagi sa ilang pagbalhin ngadto sa Mandaue City College sa Sports Complex nga ubos sa pagdumala ni Retired DepEd Regional Director Susana Cabahug.
Si Professor Vic Duran nga maoy tigpamaba sa MCC nga ubos sa pagdumala sa presidente nga si Dr. Paulus Canete nga nahinabi sa Banat News miingon nga ang pagransak nga gihimo sa SWAT, mga armadong civil security unit sa city hall ug mga barangay tanod ang tataw nga ilegal.
Giklaro niya nga magpadayon ang klase sa gatusan nga nag-summer nga tinun-an sa gawas sa tulunghaan sanglit adunay giapas nga mga tukmang adlaw ang mga tinun-an nga mahuman ang ilang pagklase.
Si Majority Floor Leader Victor Biano sa iyang pamahayag ngadto sa mga tigbalita ang miingon nga ang gihimong lakang sa mayor nga pagdala og mga polis ug mga armadong civil security sa city hall nga giatol og tungang gabii ang tataw kaayong dili makiangayon alang sa naapektohan nga mga tinun-an.