Ukay-ukay gipagawas, gihimakak sa CIDG-7

Gihimakak sa kadagkuan sa Criminal Investigation and Detection Group (CIDG-7) ang report nga dunay gipagawas nga mga sinakong ukay-ukay gikan sa ilang buhatan niadtong nilabay'ng gabii.

Sa report sa Balitang Bisdak kagahapon si Supt. Rex Derilo mihimakak nga dunay gipalusot nga mga ebidensya apan tungod sa maong report daling mimando kagahapon sa buntag sa pag-ihap sa tanang nasakmit nga ukay-ukay ug kini nasutang kumpleto nga 80 ka banata.

Ang maong mga ukay-ukay gisakmit sa CIDG-7 pinanguluhan ni Sr. Insp. Patrick Vaño ug Insp. Richard Balaba diha sa usa ka bodega sa may dalan Rabaya sa South Reclamation Area nga gipanag-iya sa usa ka Myrna Salomon nga taga Cagayan de Oro City niadtong milabay'ng semana.

Gibana-banang nagkantidad og P10,000 ang matag banata kon sako ang maong mga ukay-ukay ug mokabat sa P800,000 ang kinatibuk-ang kantidad niini.

Ang pagronda niadtong adlawa gilusad pinasikad sa search warrant ni RTC Branch 9 ni Judge Geraldine Faith Econg tungod sa paglapas sa RA 4653 kon ang pagdili sa importasyon sa mga used clothings aron kini ibaligya.

Diha sa video footage sa Balitang Bisdak nakita ang usa ka dakong trak nga may trapal sa atop nga gisundan og usa ka sports utility vehicle samtang nagpadulong og gawas sa Camp Sotero Cabahug diin mahimutang usab ang CIDG-7.

Sumala pa sa maong report nga nakit-ang nagkarga kini og mga sinakong mga ukay-ukay ug nibiya sa dapit, gipaabot nga dunay himuong imbestigasyon ang kadagkuan sa kapolisan kabahin niini.