Nadakpan sa kapolisan sa dakbayan sa Naga niadtong Biyernes sa gabii ang usa ka tulisan kinsa mipatay sa iyang gitulis niadtong miaging tuig diha sa maong dakbayan.
Si PO1 Miguel Castanares sa Naga Police Station miila sa nabalhog na karon sa prisohan nga si Clifford Navales, 29, ulitawo, taga barangay South Poblacion, Naga City.
Matud pa ni Castanares, nga si Navales usa sa lima ka tawong mitulis sa usa ka estudyante sa nursing sulod sa balay nga gipuy-an niini diha sa Naga niadtong miaging tuig.
Usa sa mga kauban ni Navales, namatay na sa pagpanulis gihapon diha sa lungsod sa Compostela niadtong miaging buwan, matud pa ni Castanares.
Ang tulo sa iyang mga kaubanan ang nagtago-tago pa karon ug padayong gipangita sa kapolisan.
Matud pa ni Castanares nga ang “warrant of arrest” nga giluwatan ni Regional Trial Court RTC-7 judge Simeon P. Dumdum Jr. migawas na niadtong Abril 8.
Matud pa niini nga wa gyud nila pahibaw-a si Navales ug bisan ang mga higala niini aron di makasibat.