Kawatan sa gibaraderong barko sikop

Nadakpan ug nagtingkagol na  sa bilanggoan ang gitumbok nga responsable sa mga pagpangawat  sa mga barko nga mo-dry docked diha sa Trigon Shipyard Incorporated sa sitio Suba, barangay Sanggat lungsod sa San Fernando.

Kini human nadakpan sa gwardiya ug sa tripulante sa gi-dry docked nga M/V Saint Mateo ang suspek nga usa ka Jonathan Galleno, 18,  walay klarong trabaho  ug molupyo sa sitio Dunggoan, barangay Perrilos siyudad sa Carcar.

Matud ni SPO2 Victor Cuyno sa San Fernando Police Station dihang nahinabi sa Banat News ang mga gwardiya pinangulohan sa headguard niini nga si Ricardo Remiticado ug ang tripulante nga si Cesar Bayares maoy nakadakop sa akto sa suspek nga nikuha sa duha ka puthaw nga manhole cover sa barko nga gibanabanang mokantidad og P6,000.00 ug gikarga na unta sa baroto sa mga suspek.

Matod ni SPO2 Cuyno gibanabana nga moabot og upat ngadto  sa lima ang grupo  nga nagsakay og baroto nga nisulod sa private wharf ug manguha sa mga butang sa barko apan nasakpan kini sa mga gwardiya hinungdan nga naglumba-anay og panglangoy pahilayo ug nabiyaan ang suspek hinungdan nga  kini nadakpan.

Sa gihimong pagsukit sukit sa kapulisan matod ni SPO2 Cuyno ang suspek makadaghan na kini mabantayi sa mga gwardiya nga maglangoy langoy sulod sa maong pribadong pantalan ug niadto lang kining Biyernes sa ala 1:30 sa kaadlawon nadakpan.

Dugang nahipos nga kasayuran nga ang gi-dry docked nga M/V Saint Mateo makatulo ka higayun na nga gikawatan og mga butang.

Kasong pagpangawat ang gipasaka sa management sa Trigon Shipyard batuk sa suspek didto sa Provincial Prosecutors Office niadtong Biyernes ug nagtingkagol na karun sa bilanggoan.