Abogado, pamilya sikop tungod sa drugas

Usa ka abogado lakip na iyang mga kabanay ang gidakop sa hiniusang pwersa sa Philippine Drug Enforcement Agency ug Regional Anti-Illegal Drugs Task Force sa duha ka mga sitio sa barangay Ulo sa Siquijor, Siquijor niadtong Huwebes sa kaadlawon.

Ang nangadakpan diha sa sitio Highway sa maong barangay mao sila si Atty. Rex Perewperew, 29 ug asawa niining si Emie, 30; amahan niining si Mansueto Perewperew, 62 ug asawang si Belinda, 50.

Samtang ang uyoan sa abogado nga si Pedro Perewperew, 53, ug asawa niining si Elva, 49; ig-agaw sa abogado nga si Glor Perewperew, 43 ug asawa usab niining si Estella, 44, nangadakpan sa sitio Fatima sa samang barangay.

Gidakop usab ang giingong ilang “runner” nga si Joramie Ricamara, 33.

Ang mga awtoridad armado og search warrant gikan nila ni RTC judges Ramon Codilla,Jr ug Judge Teresita Galanida sa Mandaue RTC batok sa mga suspek.

Ang grupo sa PDEA-7 gipanguluhan ni Atty. Jennifer Rosales ug SPO4 Jessie Cabalda samtang ang RAIDSOT gipanguluhan usab ni Sr. Supt. Drusillo Bolodo, Supt. Marvin Sanchez ug Siquijor Provincial Police Office director Sr. Supt. Orlando Ualat ug mga sakop.

Matud pang Rosales ang pamilyang Perewperew nabaniog na sa maong dapit nga maoy tigsuplay og gidiling drogas apan wala pay bisan usa ka anti-illegal drugs operations nga gihimo batok kanila ang lokal nga mga polis.

“People perceived them as untouchables in the area because there were no anti-illegal drug operations conducted against them. That is probably because they are armed and one of their family members is a lawyer,” asoy pang Atty. Rosales.

Si Jessie Tabanao, ang assistant spokesman sa PDEA-7 nagkanayon nga ilang giadto ang panimalay ni Atty. Perewperew aron masigurong makuhaan gyud kini og ebidensya pinaagi sa pagpalit og drogas.

Matud pa niya si Ricamara maoy miabli sa pultahan ug nangutana kanila kung “mokaon mo? (mosuyop)” human niini gitawag niini ang abogado ug giingong maoy nikuha sa drogas ug mitunol niini ngadto kang Ricamara, ang naulahi mihatag usab sa bayad ngadto sa abogado.

Nunot niini daling gidumog sa mga operatiba ang balay apan nakabantay si Ricamara ug gisirad-an ang pultahan hinungdan sa pagkapiit sa kamot ni PO3 Clint Cañete. Si FO3 Priscellano Gingoyon mao nay mibuak sa pultahan aron maablihan ang balay ug gihimo dayon ang pagronda.

Samtang ang laing mga grupo usab maoy misulod sa panimalay sa ginikanan sa abogado sa samang sitio ug ang ubang grupo miadto usab sa mga panimalay sa uban pang suspek sa pikas sitio.

Apan si Atty. Perewperew sa unang pakighinabi sa mga tigbalita midumili sa pagkomentaryo sa pasangil, sa ikaduhang pagsuway sa mga tigbalita mihimakak kini sa mga pasangil nga siya maoy lider sa grupo ug dili tinuod nga sila untouchables kun walay gikahadlukan sa ilang dapit.

Gipakagamay ra usab niini nga mamahimo kining basehan aron siya ma-disbar sa pagka-abogado.

“This is not enough as basis for disbarment unless you are convicted and right now I am still presumed innocent under the eyes of the law,” pasabot pang Perewperew.

Nakuha gikan kanila ang nagkalain-laing gidak-ong pinutos nga gidudahang shabu, mga kwarta, dolyares ug armas nga .357 revolver, mga bala sa .22 magnum, .38 nga bala, drug paraphernalia ug drug packing instrument.