Lalaki giluba og gunting patay

Patay ang usa ka 38-anyos nga lalaki human kini lubaa og gunting sa nag-abang sa ilang balay nga giingong iyang giselosan niadtong Huwebes sa hapon sa sitio  Neighborhood, barangay Tabunok, dakbayan sa Talisay.

Ang biktima giila sa mga polis nga si Rodolfo Aranas Jr.,  residente sa maong lugar   nakaangkon og tulo  ka samad dinunggaban sa iyang lawas usa niini ubos sa tuo niyang suso  ug  gidala sa Talisay District Hospital apan gideklarar kining patay na sa doktor pag-abot sa tambalanan.

Ang suspetsado giila usab sa mga polis nga si Roland Añasco, 28,   lumad nga taga Albuera, Leyte, usa ka kanhi security guard   daling miikyas ug hangtod karon padayon pang gipangita sa mga polis.

Sila si PO3 Mikie Espina, PO1 Jundave David ug PO1 Roy Sarsaba ang daling miresponde sa maong hitabo.

Si Sarsaba sa pakighinabi niini sa Banat News nagkanayon nga si Aranas   giingong nagselos kang Añasco diin nianang pagkabuntag sa wala pa mahitabo ang insidente gikomprontase sa biktima ang suspetsado.

Matud ni Sarsaba nga wala ganahi namati ang asawa ni Aranas hinungdan nga milakaw kini.

Nianang pagkahapon sa mao gihapong adlaw naglalis na usab ang suspetsado ug biktima nga misangko ngadto sa sinukmagay.

Si Añasco ang nakagunit og gunting ug giduslak ngadto kang Aranas.

Si Sarsaba nagkanayon nga si Aranas  giingong nangayo og panabang sa iyang inahan ug magpadala ngadto sa tambalanan apan posibleng sa kahadlok niini wala na makahuna-huna sa buhaton hinungdan nga wala dayon madala ngadto sa tambalanan ang biktima.

Ang nahisgutang polis midungag nga pag-abot sa asawa ni Aranas nahibulong kini nga ang iyang bana naghigda na sa sofa ug adunay dugo sa sawog hinungdan nga nangayo kini og panabang ngadto sa barangay hall apan giingnan nga paderetsohon na lang ngadto sa police station.

Naabtan sa mga polis nga wala na maglihok ug migahi na ang lawas sa biktima.