Sunog sa Ibo 50 ka balay ugdaw

Mokabat sa 50 ka mga panimalay ang gilamoy sa dakong sunog nga niulbo sa sitio Commonwealth atbang sa barangay hall sa barangay Ibo dakbayan sa Lapulapu  kagahapon   sa buntag.

Ang alarma nadawat sa kabomberuhan alas 11:35 ug daling giisa ngadto sa general alarm gumikan kay sagad sa mga panimalay ginama sa mga light materials ug nagsikit-sikit.

Ang maong sunog gikatahong diha magsugod sa panimalay nga gipanag-iya ni Elvie Butal kinsa ang maong balay daplin sa dagat ug dunay nag-abang sa panimalay niini giilang si Ellen Alos matud pang SFO1 Atilano Berido ang fire investigator sa Lapulapu City Fire Department nga nahinabi sa Banat News.

Gibana-banang 1.2 milyones ang kinatibuk-ang danyos sa 50 ka mga balay nga gilamoy sa kalayo.

Matud ni Chief Insp. Ricardo Cornillo sa  Lapulapu Fire department nga naglisod sila sa pag-penetrate tungod kay ang kalayo diha sa tunga sa mga panimalay, ingon man ang kagagmay sa mga agianan ug kakusog sa hangin.

“Ang direction asa sukad ang hangin adto ang volume sa kayo” dugang pa niya nga nahinabi sa Banat News.

Ang sunog nakontrolar sulod sa 10 ka minutos human maisa ang general alarm diin tanang mga bombero sa kasikbit nga mga dakbayan nangabot uban sa mga fire brigade volunteers.

Hinuon walay gikatahong naangol sa mga sakop sa kabomberohan ingon man ang mga residente nga apektado sa maong sunog.

Si SFO1 Berida nga base sa iyang pakisusi ang extention wire     sa outlet nga wala maibot sa balay ni Butal maoy nibuto ug maoy hinungdan nga dali kining miulbo ang kalayo.

“Nagtan-aw paman kuno ni sila og TV anang buntag, gipawong apan wala maibot ang extention tungod sa kainit mao tong nibuto.