Simbahan di moapil sa problema pag-apod sa bugas

Dili manginlabot ang Archdiocese of Cebu sa plano sa gobiyerno nga patabangon ang simbahan sa pagpang-apod-apod sa NFA rice.

Usa sa gustong moapil ang simbahang katoliko ug ang ubang relihiyon pag-distribute sa baratong bugas gikan sa NFA mao mismo si Mayor Tomas Osmeña.

Gani nipadayag nang daan ang mayor nga siya dili magproblema sa pagpakiglambigit sa simbahang katoliko alang sa maong katuyuan.

Buot masiguro ni Osmeña nga maapod-apod ang baratong bugas sa NFA ngadto sa tanang kabus sa dakbayan nga dili makapalit sa mas mahal nga commercial rice.

Partikular na niini ang mga molupyo sa mga bukirang barangay sa dakbayan nga wala mabutangi og outlet sa NFA nga ilang kaduolan.

Apan matod sa tigpamaba sa Archdiocese of Cebu, Monsenyor Achilles Dakay, dili musugot si Ricardo Cardinal Vidal sa maong plano.

Nabalaka ang Cardinal nga maapil ang simbahan sa sudyaan kung magkagubot ang mga Sugbuanon sa dili unya maayong pagpang-apod-apod sa bugas.

“Dili mosugot ana si Cardinal kay dili mi gusto nga pasanginlan, naa unyay dili mahatagan, mag-away unya, pasanginlan na sab ta,”sumala  pa ni Dakay. 

Labaw sa tanan miingon si Dakay nga dili usab sila gusto nga gamiton ang simbahan sa kapalpakan sa kagamhanan paghatag sa batakang serbisyo sa katawhan.

“Unsa man unya ang sunod nga ipa-distribute sa gobiyerno gawas sa bugas, contraceptive na sab, condom na sab, ambot lang!”dugang pamahayag ni Dakay.

Gusto sa kagamhanan nga ang simbahan moapil sa pagpang-apod-apod sa NFA rice aron mawagtang ang mga pagduda nga kini dunay paburan.

Kini ilabi na sa mga kabus nga mga mulopyo, nga didto nisuporta sa mga kandidato sa oposisyon sa nakalabay nga eleksyon.