Duha ka Indian 'saypang gikidnap

Duha ka Indian National ang unang gika-report nga gi-kidnap ug gidala sa mga suspetsado paingon sa habagatang bahin sa Sugbo luwan sa usa ka van nga kolor itom nga dunay plaka nga YUB 439.

Sa gihimong pakisusi sa kapulisan nailhan ang duha ka Indian national mao sila si Sarbjit Singh, 27 anyos, nagpuyo sa lungsod sa Argao ug ang kauban niini nga si Balvir Kumar,33 anyos, nagpuyo sa Nueva Ecija.

Ang mga sakop sa kapulisan sa lungsod sa Boljoon naalarma ug nipahibalo ngadto sa kapulisan sa lungsod sa Oslob nga nagpaingon sa ilang hurisdiksyon ang mga suspek niadtong Huwebes sa alas 5:30 sa hapon.

Nasayran gikan kang SPO1 Manuel Regulacion sa kapulisan sa Oslob dihang nahinabi sa Banat News gimando ni Sr. Insp. Richard Oliver ang pagbutang og checkpoint ug pagpangita sa palibot.

Diha na nila kini maapsi sakay sa usa ka barge gipanag-iya sa Maayo Shipping Lines nga padulong na sa Negros.

Nasuta nga ang maong mga langyaw wala diay mga dokumento sa ilang pag-anhi bisan na passport dihang ilang giadto ang mga nisikop.

Pakyas hinoon ang kapulisan pagdakop sa maong duha ka Indian national human nagpaila ang lima ka mga kauban niini nga mga sakop sa operatiba sa Bureau of Immigration and Deportation (BID) pinangulohan sa nagpaila nga si Atty. Ferdie Balbuena ug nipresentar kini og mga papeles may labot sa ilang mission order.

Samtang si SPO4 Manuel Villanueva sa Boljoon Police Station  mitug-an nga wala makig-alayon kanila ang mga operatiba sa BID hinungdan nga na-aan nila kini nga usa ka kidnapping.