Umento sa suweldo gikabalaka ni Edu
Nabalaka karon si Konsehal “Edu” Rama sa gipangayong umento sa suholan sa nagkadaiyang mga labor group.
Ang ALU-TUCP ingon man ang Cebu Labor Coalition, nagplano pagduso og petisyon alang sa dugang P150 sa minimum nga suholan.
Apan nagtuo si Rama nga dili makasugakod ang ubang mga kompaniya sa paghatag niini ngadto sa ilang mga trabahante, partikular na ang anaa sa small and medium enterprise.
Ang konsehal nga maoy chairman sa Committee on Labor sa City Council nakapanglantaw nga daghang kompanya ang manira kung kini ipamugos.
“I don’t think nga ang ubang kompaniya maka-survive anang P150 nga gipangayong wage increase, that’s why nga kinahanglang trabahuon gyud na sa wage board, estudyuhan kung angayan ba nga hatagan og dako, sakto lang, resonabli o unsa ba,”sumala ni Rama.
Nagtuo hinuon ang konsehal nga dili na paigo sa inadlaw-adlaw nga panginahanglan ang kasamtangang minimum nga suhulan ilabi na nga nisaka usab ang presyo sa mga palaliton.
“Dili na gyud na paigo ang gidawat karon nga minimum wage sa mga trabahante, pero kung hatagan usab sila og taas ra nga umento, duna gyoy posibilidad nga mawad-an na hinoon sila og trabaho kay mapugos man gyud pagpanira ang mga kompanya nga dili kahatag,” matud ni Rama.
Kahinumduman nga niadtong miaging Nobyembre 19, ang Regional Tripartite Wages and Productivity Board (RTWPB-7) nipagawas og bag-ong wage order.
P9 ang gihatag sa wage board nga umento alang sa gi-classify niini nga Class A areas, ug P5 usab alang sa Class B, C ug D areas.
Ang Class A areas naglakip sa mga siyudad sa Sugbu, Mandaue, Lapu-Lapu, Danao, Talisay, Carcar ug Naga uban sa mga lungsod sa
Sa kasamtangan, P250, P230, P220, ug P205, ang minimum wage sa Class A, B, C ug D areas alang sa non-agriculture industry.
- Latest
- Trending
