Hotdog, sausage, tocino, etc mosaka ang presyo: Pampi

Mousbaw ang presyo sa gi-process nga mga karne nga mokabat sa 20 porsiyento ug mousbaw usab og 15 porsiyento usab ang mga linata nga karne.

Kini ang gipahibalo ni Francisco Buencamino,  executive  director sa Philippine Association of Meat Processor Inc. (PAMPI) ngadto sa mga tigbalita atol usab sa 2nd WOFEX Visayas Food processing, packaging and food services expo nga gipahigayon sa Cebu International Convention Center niadtong miaging adlaw. 

Matud pa niya nga naglakip sa gi-process nga karne nga gipaabot nga mousbaw ang presyo mao ang hot dog, burgers, sausage, tocino, longganisa, corned beef, ham ug uban pa.

Hinuon iyang gipasabot nga ang pag-usbaw dili gilayon mo-epekto sa retail market sanglit sa kasamtangan ang PAMPI   padayon sa paghatag og kasayuran ngadto sa mga distributor.

“We are still making announcements may be in around 15 days or two weeks time meat processor such as Virginia Lami, Sunpride, and King’s and among others will carry the increase so within the next two weeks  there should be no price increase in the retail market,” matud pa ni Buencamino.

Si Buencamino miingon nga ang hinungdan sa maong pag-usbaw mao usab ang padayon nga pagsaka sa mga raw materials ilabi na gayod sa pork-based product.

“Right now, the pork prices in  the market have already reached to P200,” nagkanayon si Buencamino.

Dugang pa niya nga bisan ang mga food chains nga naglakip sa McDonalds ug Jollibee  nakapahigayon na usab sa ilang pagpataas sa presyo sa miagi pang semana.

Gitataw niya nga ang maong pagpausbaw sa presyo sa mga produktong karne kabahin sa nasinati nga pag-usbaw usab sa mga lata nga  gisudlan  niini.

Si Buencamino miingon nga mga tin manufacturers sa nasud   nakapahigayon na og 30 porsiyento nga pagpausbaw ug kini naglangkob sa 47 ngadto sa 50 porsiyento sa ilang produkto.

“It resulted to a 15 percent increase of prices for tin-canned goods in the market such as corned beef, meat loaf, sardines and others,” ni Buencamino pa sa iyang pamahayag.

Dugang pa niya nga ang pagnihit sa supply sa karne alang ngadto sa mga pabrika  sa nasud ang kabahin usab sa nakaingon sa pag-usbaw sa presyo apan nagtinguha pa sila sa pagpakigtagbo sa mga supplier niini.