Mga negosyante manira kun ...

Ang mga negosyante sa Sugbo mipasidaan sa dakong peligro nga mosira ang mga negosyo o kaha mopadayon ang  pagsaka sa presyo sa tanang palitonon matag karon ug unya kun suportahan sa gobiyerno ang  planong pag-umento  sa suhol nga gipangayo sa  mga mamumuo.

Mao kini reaction ni Gordon Alan Joseph, executive officer sa Cebu Business Club gumikan sa gipangayong P150 nga umento sa mga trabahante sa Associated Labor Union-Trade Union Congress of the Philippines.

Miingon si Joseph nga wa silay supak nga mangayo og umento ang mga mamumuo sa ilang suhol apan di usab nila angayang palabian ang gidak-on niini.

Nahaigking si Joseph dihang nabasa niya sa pamantalaan ang petisyon ni Michael Democrito Mendoza, Vice President  sa ALU-TUCP sa Central Visayas nga nangayo og P150 nga umento sa sweldo matag adlaw sa mga mamumuo dinhi sa Kabisay-an.

Matud pa ni Joseph nga duha lamang ka butang ang mapaabot sa tanan kun dili mapiog sa kagamhanan kining yangungo sa mga mamumuo sa pagpangayo og dagkong umento sa suhol.

Miingon siya nga kadtong makaapas sa dagkong kantidad nga umento, mahimong magpadayon sa ilang negosyo pero dili kapugngan ang ilang pagpasaka sa presyo sa ilang mga produkto.

Sa laing bahin kadtong mga negosyante nga di na makaapas sa gipangayong umento  way laing mahimo gawas sa pagtak-op sa ilang negosyo.

Miingon si Joseph nga kinahanglang timbang-timbangon gyud sa gobiyerno ang umento nga pangayoon sa mga mamumuo .

Kay sa higayong duyogan ra sa mga kadagkoan sa gobiyerno ang unsa mang pangayoon sa mga trabahante unya mapiit ang mga negosyante, way laing mahimo ang naulahi kundi ang paghunong sa ilang negosyo.

Ang petisyon sa ALU-TUCP gisang-at na ngadto sa Regional Tripartite Wages and Productivity Board RTWPB.-7.