Ex kapitan gikasuhan

Gipasakaan na og kasong frustrated murder ang kanhi kapitan sa barangay Mayana,lungsod sa Barili, Cebu nga si Elpedio Presbetero ang suspek sa pagpusil sa asawa sa nakapildi niining kapitan nga si Jonas Benondo gawas sa barangay hall niadtong Martes sa gabii.

Ang imbestigador sa Barili Police nga si PO2 Hector Veloso maoy  mipasaka   sa kasong frustrated murder batuk kang Presbetero sa Provincial Prosecutors Office kagahapon sa alas 11:00 pasado sa buntag.

Matud ni SPO1 Zaldy Orillo, desk officer sa Barili Police Station dihang nahinabi sa  Banat News duha ka saksi ang niduso og pinanumpaang pamahayag nga positibong nagtumbok kang kanhi kapitan Presbetero nga maoy nipusil sa biktima nga si Myrna Sebuco Benondo.

Kini mao ang hepe sa tanod nga si Teofisto Sebuco ug ang laing tanod nga si Isidro Baya nga duty sa barangay hall niadtong tungura dihang nahitabo ang pagpamusil gawas sa barangay hall.

Gipildi ang kanhi kapitan sa bana sa biktima nga si kapitan Jonas Benondo niadtong eleksyon sa barangay.