Mga riple nasakmit

Mga tag-as nga kalibre sa armas ug riple ang nasakmit sa mga sakop sa Criminal Investigation and Detection Group-7 gikan sa panimalay sa usa ka mag-uuma sa sitio Agbagon, barangay Adlaon niadtong Miyerkules sa gabii.

Samtang nadakpan usab ang usa sa mga tag-iya niini nga giilang si Mauricio Dionson, 66, residente sa samang dapit apan wala maapil ang iyang anak nga usa usab sa subject sa search warrant nga si Judito.

Ang grupo ni Sr.Insp. Richard Caballero sa CIDG-7 maoy mironda sa panimalay sa duha pinasikad sa search warrant nga giluwatan ni RTC Branch 15 Presiding Judge Fortunato de Gracia batok sa duha tungod sa paghupot og mga dili lisensyadong armas.

Nakuha diha sa panimalay ni Mauricio ang usa ka .30 caliber nga bolt action rifle ug 55 ka buhing bala niini, usa ka .38 caliber revolver nga paltik ug kinse ka buhing bala niini nga gisaksihan sa mga tanod.

Samtang diha sa panimalay sa anak ni Mauricio nga si Judito nakuha usab ang usa ka U.S. Carbine Caliber 30 M2 Rifle nga may serial number, usa ka .45 caliber pistol nga paltik, upat ka magazine sa caliber 30 M2 sa US Carbine; 30 ka buhing mga bala niini; tulo ka magazine sa kalibre .45 ug 12 ka buhing bala sa kalibre 45.

Gisaksihan usab ni Adlaon barangay kapitan Nieves Nara ug sakop sa Lupon ng Tagapamayapa ang pagsiksik sa balay ni Judito.

Walay napakitang mga lisensya si Mauricio sa pagtinir nila sa maong mga armas gawas lang  sa pag-angkon nga sila mga kanhi sakop sa anti-communist niadtong dekada 80.

“We received information that these two are illegally possessing high powered firearms. They claimed that they were former members of the anti-communist terrorist cadres but were not able to surrender their firearms to the government,” asoy pang Caballero.

Matud pang Caballero nga igo ra silang nitubag sa tawag sa usa ka concerned citizen kabahin sa mga loose firearms nga gihuptan sa duha ug kini aron dili usab magamit sa mga krimen.

Giklaro hinuon ni Caballero nga wala sila makadawat og impormasyong nasakop og bisan unsang criminal groups ang duha.

Si Mauricio dihang gihinabi sa mga tigbalita mitug-an nga pangdepensa nila sa mga rebeldeng komunista ang maong armas kaniadto apan kini nagkanayon nga wala siya mag-usik usik og bala sa pagpabuto lang niini ug wala usab niini kini magamit pagpasipala og laing tawo.Si Kapitan Nara sa pakighinabi usab nagkanayon nga walay dautang rekord ang manag-amahan ug wala usab kini makadungog nga dunay gikaaway ang duha diha sa iyang barangay.