Wanted sa kasong panglugos nasikop

Nadakpan sa kapolisan didto sa siyudad sa Danao ang usa ka batan-ong lalaki nga dugay nang wanted sa kasong pagpanglugos sa usa ka minor de edad ug kaugalingon niining ig-agaw didto sa lungsod sa Carmen.

Ang suspek nga motulo ka tuig kapin nang pinangita sa balaod giila sa kapolisan nga si Christo Rey Parot, 23,   walay klarong trabaho ug molupyo sa Pier area sa barangay Poblacion, lungsod sa Carmen.

Nasayran gikan kang SPO4 Ramirito Ramonida sa Danao City Police Station dihang nahinabi sa Banat News nga nadakpan ang suspek sa kasamtangan niini gipuy-an sa barangay Looc sa nahisgutang siyudad niadtong  miaging hapon sa alas 4 ang takna.

Gidakop ang suspek pinasubay sa warrant of arrest nga giluwatan ni Danao City RTC  Judge Edito Enemesio sa kasong rape  diin walay piyansa nga gitugot ang korte alang sa temporaryo niining kagawasan.

Samtang gikonpirmar ni PO1 Ricky Linawagan sa Carmen Police Station dihang nahinabi sa Banat News nga nag-atubang og kasong pagpanglugos ang suspek sa ilang lugar.

Matud pa usa ka 14-anyos  ug kaugalingong ig-agaw sa suspek ang giunay niini og lugos didto sa pinuy-anan niini sa Pier area sa barangay Poblacion.

Nalangay ang pagdakop sa suspek human misibat kini ug nagtagotago human sa  kremin.