Patay diha-diha ang usa ka 26-anyos nga Filipino-Iranian human gipusil kagahapon sa ala 1:45 sa kaadlawon sa may dalan F. Gonzales, Unit 3, Carbon Market, barangay Ermita ning dakbayan samtang sakay sa motorsiklo kauban ang silingan niini.
Si Parhad Cababahay Panahandeh, residente sa Sitio Bogo, barangay Quiot, ning dakbayan nakaangkon og samad pinusilan sa walang nawong, tuong bahin sa ulo hinungdan sa hinanaling kamatayon.
Samad sa ubos nga dughan ug walang bukton ang naangkon sa silingan ni Panahandeh nga si Wilmar Sadora Blanco, 19, extra waiter sa Alta Vista, apan natabang sa mga doktor sa Cebu City Medical Center.
Si Blanco nakadagan paingon sa Carbon Police Station ug nagpatabang human sa hitabo, hinungdan nga nahatod kini sa CCMC.
Sumala pa ni SPO2 Rey Cuyos sa Homicide Section nga silang Panahandeh ug Blanco sakay sa motorsiklo sa Filipino-Iranian sa dihang gipa-ulanan og bala sa mga lalaki nga sakay sa laing motorsiklo.
Si Sr. Supt. Patrocinio Comendador, direktor sa kapolisan sa dakbayan nagkanayon nga susihon nila ang insidente tungod sa nakuha nga I.D. sa usa ka PO1 Chester Sagaldia nga nakuha sulod sa bag ni Panahandeh. Si PO1 Sagaldia bag-o nga sakop sa CCPO, apan absent without leave sa pagkakaron.
Si Panahandeh gilambigit sa kapolisan sa kalihukan sa ginadiling drugas.
Giangkon hinuon ni Comendador nga adunay mga polis nga mobilin isip collateral sa ilang I.D. sa PNP.
Nakuha usab sa bag ni Panahandeh ang .45 kalibre nga pistola, kagamitan sa paggamit sa ginadiling drugas ug mga personal nga gamit sa namatay.