Giluba atubangan sa iyang hinigugma

Samaran sa tiyan ang usa ka ulitawo nga gidunggab atubangan sa iyang uyab didto sa barangay Poblacion, dakbayan sa Danao kagahapon sa kaadlawon.

Ang biktima mao si Vincent Olivar Diaz, 18, ulitawo, residente sa Tuburan Sur,  dakbayan sa Danao. Base sa imbestigasyon ni SPO4 Ramerito Ramonida sa Danao Police  Station nasayran nga samtang naglakaw kini sa Pine Tree Mall sa Poblacion, dakbayan sa Danao kuyog ang iyang hinigugma, usa ka tawo ang misugat kanila dayong sukmag ngadto kaniya.

Gumikan sa kangitngit sa maong dapit wala makabantay si Diaz nga mibunot og mahait nga hinagiban ang suspetsado dayong dunggab sa tiyan niini.

Gidali pagdala si Diaz sa Danao District Hospital apan gibalhin kini sa VSMMC gumikan sa samad nga nahiaguman.

Samtang padayon pa ang pag-ila sa suspetsado ug pagsusi sa motibo sa maong pagpanunggab kang Diaz.

Hinuon luwas na sa makuyaw nga kahimtang ang biktima nga ubos pa gihapon kini sa obserbasyon sa mga mananambal.