Pito ka tawo ang naangol apil na ang duha ka drayber ug lima ka pasahero sa panagbangga nga nahitabo tali sa usa ka motorsiklo ug traysikol didto sa subidahon nga dalan sa barangay Bagatayab, lungsod sa Sogod, Cebu niadtong Domingo sa alas 8:45 sa buntag.
Ang mga naangol human makaangkon og mga pangos ug samad sa ilang bukton ug kalawasan mao ang drayber sa motorsiklo nga si Joel Somutia Talisik, 22, ulitawo, molupyo sa barangay Lorega, dinhi sa dakbayan sa Sugbo.
Samtang ang drayber sa traysikol giila nga si Dionisio Sohot Ombrero, 28, molupyo sa Borbon, Cebu.
Ang mga pasahero sa traysikol nga nangaangol sa maong panagbangga giila nga sila si Fe Montecillo, taga Sitio Panangatan,barangay Bawo, Sogod, Dionisio Mondero, 29, taga Negros, Cleofe Nuñeza, 42, taga Poblacion lungsod sa Catmon, Trinidad Eve, 28, minyo, taga Panangatan, Bawo, Sogod ug Ray Montecillo, 34, taga Bawo, Sogod.
Subay sa gihimong imbestigasyon sa kapolisan ang motorsiklo nga nagdala sa plaka nga GF-8343 nga gimaneho ni Talisik kusog-kusog kining nagpadagan paingon sa lungsod sa San Remegio ug pag-abot sa subidahon nga dalan mikawat kini og linya sa pikas ug wala makabantay sa gikasugat niining traysikol nga puno sa mga pasahero hinungdan nga nagkabangga.
Nalagpot ang motorsiklo ug nalabay ang drayber niini samtang nalimbuwad usab ang traysikol nga puno sa pasahero niadtong tungora.
Ang mga biktima daling gidala sa Juan Dosado Memorial Hospital apan girekomendar kini nga ipabalhin sa tambalanan dinhi sa dakbayan sa Sugbo aron maatiman dayon ang mga samad ug pangos niining naangkon.