Mga boxer pahalipayan

Mipalabang og resolusyon si Bokal Juan Bolo sa Hunta Probinsyal sa Sugbu atol sa ilang sesyon kagahapon sa hapon nga nagpahalipay sa unom ka Pilipinhong boksidor nga midaog sa milabay'ng boxing competition didto sa Araneta Coliseum  niadtong Abril 6 niining bulana nga nag-ulohan “Invasion: The Philippines vs. the World”.

Matud pa ni  Bolo nga angay gyud nga pahalipayan ang maong mga boksidor nga sila si Gerry Peñalosa, Rey “Boom-boom” Bautista, AJ “Bazooka” Banal, Michael Domingo, Ciso Morales ug Bert Batawang.

Kini gumikam kay nakahatag man sila og dungog dili lang sa mga Sugbuanon, apan lakip na sa tanang Pilipinhon sa dihang ilang giharos ang tagsa-tagsa ka mga kaatbang nga langyaw.

Si Peñalosa nagpabiling kampiyon sa WBO Superbantamweight human iyang gipalukapa sa ikaunom nga hugna si Ratanachai Sor Vorapin sa gikatakda nilang 12 ka hugna   nga away.

Samtang nadepensaan usab ni Bautista ang iyang bakus human iyang gipaundang ang Mehikanong si Genaro Camargo samtang ang uban nga mga boksidor pulos mikulit og technical  knockouts (TKO)

Matud sa bokal nga ila usab nahatagan og pasidungog ang maong mga boksidor nga nakatampo og dakong dungog sa nasud.

Malaumon si Bolo nga walay mosupak sa iyang mga kaubanan diha sa  hunta probinsyal sa maong resolusyon.