Nadsu nanawagan sa publiko

Nanawagan karon ang Nagkahiusang Driver sa Sugbu (NADSU) ngadto sa mga Sugbuanon nga mo-uban sa ilang panawagan ngadto sa kagamhanan.

Kini human usab ipatuman sa nagkadaiyang mga kompanya sa lana sa nasud  ang laing umento sa presyo sa mga produktong petrolyo.

Ang mga higanteng kompanya sa lana nipatuman na usab og laing P0.50 matag litro sa krudo ug gasolina niadtong miaging adlaw.

Kini mao na ang giingong ikapito ka higayon nga pagpatuman og umento sa presyo sa mga produktong petrolyo sulod niining tuiga.

Matud sa Secretary General sa NADSU nga si Ruben Rama, kinahanglang magpakabana na ang tanan sa giingong wala nay kinutoban nga oil price increase.

Daw nawad-an na og paglaum si Rama nga mo-us-os pa ang presyo sa lana hinungdan nga siya nanawagan na ngadto sa katawhan nga mouban sa ilang gipakigbisugan.

“Kuli na man gyud ni nga makontrolar ang pagsaka sa mga produktong petrolyo, nanawagan mi sa katawhan nga mobarug na sa kalisod karon,” sumala ni Rama.

“Ang amo gyung gipanawagan nga mabasura ang Oil Deregulation Law, naa pay RVAT, EVAT unsa pa nang ubang buluhisan nga naghatag og kalisod sa katawhan,” nagkanayon si Rama.

Nisamot ang kadismaya sa Secretary General sa NADSU tungod kay ang ilang petisyon sa umento sa pletihan giingong giyak-an sa ahensyang hingtungdan.

Miingon si Rama nga dugay ra nilang gipangayo og balik sa LTFRB ang P1.50 nga gihatag kaniadto nga usbaw sa pletehan apan giingong kini wala hatagi og pagtagad.