Duha ka babaye ang naangol atol sa pagkalimbuwad sa usa ka pick up sa ibabaw nga bahin sa Marcelo Fernan Bridge habig sa barangay Pusok dakbayan sa Lapulapu kagahapon sa hapon.
Ang naangol mao si Engr. Jayette Rosello Goden, 26, dalaga ug residente sa Villa Leyson dakbayan sa Sugbu ug usa ka sales engineer sa JLR Construction and Aggregates Inc. nga nagbase sa barangay Tingub dakbayan sa Mandaue.
Base sa pamahayag sa pipila ka mga saksi nga nahinabi sa Banat News kusog nga mipadagan si Goden sa iyang gimanehong pick up nga adunay plaka nga GGX 905 diin gibanabana nga 80 kilometros kada oras sa iyang pagliko paubos sa kadalanan sa Pusok ug sa dihang adunay mibuto kini miresulta sa iyang pagkalimbuwad sa maong sakyanan.
Nasuta ni PO1 Romello Adolfo, imbestigador sa traffic division nga taas ang gilay-on sa pagtamak sa break sa maong sakyanan hangtod kini nga natuwad ug gani ang tuong bahin sa ligid sa likod flat na kini ug wala nay hangin.
Atol sa pagkatuwad sa maong sakyanan dali usab nakuha sa mga sakop sa ERUF ang mga biktima ug bugtong lamang si Goden ang naila gumikan sa iyang lisensiya ug hangtod ning pagbalita wala pa mailhi ang kauban niini nga babaye nga gitumbok nga pag-umangkon usab ni Goden.
Nasayran usab sa Banat News nga padulong unta si Goden sa Mactan, dakbayan sa Lapulapu gumikan kay aduna silay proyekto sa maong dapit apan wala kini makaabot sa maong dapit gumikan sa maong disgrasya.
Si Goden ug ang iyang pag-umangkon gidala sa Mactan Doctor's Hospital human kini mahiagum sa mga samad ug pangos sa kalawasan ug hinuon luwas na sa kuyaw nga kahimtang.