2 naghikog patay; 1 miinom muriatic

Duha ka mga tawo  naghikog patay dinhi sa dakbayan sa  Sugbu sulod lang sa usa ka oras niadtong Huwebes sa hapon samtang laing babaye usab ang giingong miinom og muriatic acid kagahapon apan nabantayan sa mga kabanay ug nadala sa tambalanan.

Unang namatay mao ang usa nga 15-anyos nga si Joven Libres, tinun-an sa  high school nga taga sitio Huyonghuyong, barangay Bacayan kinsa  nagpusil sa iyang kaugalingon gamit ang usa ka .357 rebolber sulod sa iyang lawak tumong sa walang bahin sa dughan.

Si Libres namatay mga alas 3:02 sa tambalanan usa ka oras kapin human kini makit-i sa maguwang nga si Marife, 19, nga nagkadugo ug nagpakitabang sa pag-ingon “sakit kaayo ‘te.”

Daling gidala ni Marife inabagan sa ilang manghod pagdala sa tambalanan si Joven apan dangtan usa ka oras namatay kini. Ang grupo ni SPO1 Rogelio Nedamo miadto sa lawak niini ug nakit-an ang usa ka .357 rebolber nga may tulo ka buhing bala ug usa ka basiyo sa tambor niini.

Gipatawag na sa kapolisan ang amahan ni Joven nga si Renerio alang sa pagpangutana.

Samtang pasado alas 2:30 sa hapon niadtong  Huwebes usa ka kanhi drug adik ang naghikog patay sulod sa pansayan sa ilang panimalay diha sa Peace Valley barangay Bulacao.

Ang naghikog si Danilo Getizo, 40, ulitawo, way trabaho nga nagpuyo sa nahisgutang dapit namatay human naghikot sa iyang liog ginamit ang 2.32 meters nga gitas-on sa wire.

Sa report nila ni SPO1 Nedamo ug mga kaubanan sa Homicide Section sa Cebu City Police Office ang maguwang sa biktima nga si Luzviminda Getizo maoy nakakaplag sa iyang igsuon nga nagbitay na sulod sa pansayan.

Ang maguwang  mitubag sa sugo sa lawas dihang nabantayan niini nga  naka-lock ang  pultahan  sa pansayan hinungdan nga iyang gituktok sa makadaghang higayon apan walay motubag.

Hinungdan nga iyang gipugos pag-abli ang pultahan ug mao na lay iyang nakita nga nagbitay na ang iyang igsoon sa bara-bara sa pansayan  ug gidali sa pagputol ang wire ug nangayog panabang sa mga silingan kinsa maoy  mitawag sa kapolisan.

Unang  miresponde ang mga sakop sa Pardo Police Station diin ang biktima patay nang nagbuy-od sulod sa pansayan hinuon way timailhang adunay foul play sa kamatayon gawas lang sa lakra sa gihigot sa liog.

Samtang sa pikas nga bahin usa ka 21 anyos nga katabang ang naghikog pinaagi sa pag-inom  og usa ka botelyang muriatic acid kagahapon sa udto diha sa may St. Martin Heights, barangay Sapangdaku.

Si SPO4 Alex Dacua ug mga kauban sa Homicide Section sa Cebu City Police Office miila sa biktima nga si Irish Mondano.

Sumala pa niini nga ang agawon niini nga si Lea Laurel nga ilang gikahinabi didto sa Cebu City Medical Center maoy nakakita niini sulod sa ilang quarter nga nagbuwa-buwa na ang baba niini.

Hinungdan nga nidali kini sa pagpanawag sa Emergency Rescue Unit Foundation hinuon ang biktima dili na dilikado ang kahimtang niini sa pagkakaron.

Gitataw niini nga ang agawon mitug-an nga hapit gyud mahurot ang usa ka botelya nga gisudlan sa maong muriatic acid dihang naabtan kining nagbuwa-buwa ang baba.

Samtang dili pa nila matino kun buntis ba gayud kini tungod kay ang maong isyu mga tabi-tabi lang, ila pa usab nga himoan sa pag-follow-up ang maong insidenti ingon man adtuon ang panimalay gumikan kay didto lamang nila nahinabi ang amo niini sulod sa tambalanan.