Wala na matabang ang usa ka balay dihang kini gilamoy sa sunog uban ang usa ka 17-anyos nga special child nga gibilin sa iyang ginikanan diha sa sitio Libas barangay Bonbon kagahapon sa hapon gibana-banang kapin 20 kilometros gikan sa downtown area.
Si SFO2 Alicasim Espinola, duty fire investigator sa Cebu City Bureau of Fire Protection sa pakighinabi sa Banat News niila sa biktima nga si Radegundo Villarobe, Jr. nga gibilin diha sa balkonahe sa ilang balay.
Ang sunog miulbo gibana-banang alas 2:30 apan gumikan sa gilay-on sa lugar walay nakaabot sa tukmang oras nga mga kabomberohan.
Ang amahan sa biktima nga si Radegundo Sr. ug asawa niini gikatahong milakaw aron magpatambal diha sa Banawa, Guadalupe dihang nahitabo ang sunog.
Giingong ang bayaw niini nga si Jefferson Mabatid, 30, maoy gibinlan kaniya apan dihang nakatulog na ang biktima milakaw si Mabatid ug mao nalay sunod nga nahitabo mao ang sunog.
“Ingon sa mga silingan diha daw sa balkonahe nagsugod ang kalayo unya kusog kaayo wala na nila matabang kay mixed-materials man gud,” asoy pang Espinola kinsa miangkong bisan ang ilang mga firetrucks di makasugakod og saka-kanaog sa agianan bisan kini sementado.
Subay sa gibutyag sa mga silingan kang Espinola nadunggan nilang nagpunay og siyagit ang biktima diha sa ikaduhang andana sa balay nga ginama sa kongkreto sa ubos ug kahoy, lawanit ug kawayan lang sa ikaduhang andana.
Maayong pagkapaig sa biktima ug lugos nang mailhan sumala pang Espinola kinsa midugang nga ang balkonahe mao gyuy binlan kaniya ug ikandado lakip na ang main door kung manglakaw ang pamilya gumikan kay giingong manakit ug manghilabot kini kung buhian.
Aron dili kini alimut-an ang bungbong sa balkonahe gi-ekis ekis og porma apan gumikan sa kalig-on pagkapanday niini wala kini maguba sa biktima dihang nagsugod na ang kalayo paglamoy sa panimalay.
Sumala pang Espinola dunay electrical outlet diha sa maong balkonahe ug posibleng mao kini ang giduwaan ni Radegundo Jr. ug sinugdanan sa kalayo sanglit wala man kini maagian padulong sa kusina aron magduwa og posporo.
Gibana-banang mokabat og P40,000 ang danyos sa maong sunog sumala pang Espinola.
Ang biktima maoy kinamanghurang anak sa pamilyang Villarobe ug ang mga igsuon niini pulos na nangaminyo ug nagpuyo na sa kaulohan.