Shabu 'tambal'  sa hubak

Tulo ka tawo ang nadakpan ug usa ka 12-anyos ang naluwas gikan sa kalihukan sa ilegal nga drugas sa gihimong managlahing buybust operation sa mga sakop sa Philippine Drug Enforcement Agency-7 ug Criminal Investigation and Detection Group-7.

Apan usa sa mga nadakpan nangangkong tambal sa iyang hubak ang shabu maong nagtinil kini niini.

Arestado ang magtiayon human nila baligyai ang mga sakop sa PDEA diha sa sitio Tapal sa barangay Guadalupe sa dakbayan sa Carcar niadtong milabay'ng gabii.

Giila sila mao si  Efren Gellica, 38 ug asawa niining si  Manolita, 36, mga residente sa nahisgutang dapit. Ang mga sakop sa PDEA nakadawat og impormasyon kabahin sa ilang operasyon hinungdan sa buy-bust operation nga gilusad diin nakuhaan ang duha og lima ka paketeng pulos may sulod nga gidudahang shabu.

Ang mga ahente sa PDEA nipalit og usa ka paketeng shabu nga nagkantidad og P300 ug human itunol ang shabu dali silang giaresto. Matud pang Jessie Tabanao ang assistant spokesman sa PDEA-7 sa pakighinabi sa Banat News nga level two drug pushers ang duha.

Sumala pang Tabanao angkaton sa duha ang shabu sa kantidad nga P220 ang pakete gikan sa ilang supplier ug kini ilang ibaligya og P300 diha sa nahisgutang dakbayan.

Apan ang lalaking Gellica matud pang Tabanao mihimakak nga pusher kini ug ang shabu nga nakuha gikan kanila pang-kunsomo lang niini sanglit mao kini ang iyang tambal sa hubak.

Samtang sa laing bahin duha ka kaso ang atubangon sa usa ka amahan human kini madakpi sa buy-bust operation ug gihimo pa niining drug runner ang iyang dose-anyos nga anak sa barangay Lorega-San Miguel ning dakbayan.

Ang amahang gidakop giilang si Nestor Tejas, 46, residente sa sitio Camanse sa nahisgutang barangay  kinsa mitunol og usa ka dakong paketeng shabu nga may gibug-atong 50 gramos ngadto sa mga polis.

Ang Criminal Investigation and Detective Group-7 nakadawat og report kabahin sa operasyon ni Tejas pagpamaligya og drogas diha sa maong dapit ug ang gigamit niini mao ang iyang anak nga lalake isip maoy tigtunol sa gidiling drogas ngadto sa mga buyer.

“What makes it different is we received reports that he is using his own son as drug carrier in all his operations which is also considered as child abuse and violation of the RA 7610,” sumala pang Supt. Rex Derilo sa CIDG-7 kagahapon.

Ang grupo sa special operations team sa CIDG-7 migamit og boodle money ug duha ka marked money aron makapalit og 50 gramos nga shabu gikan sa suspek.

Sumala pang Derilo, dihang miabot ang suspek nagkuyog kini sa iyang anak nga nagbitbit og usa ka plastic container nga may sulod nga mga chicken feeds.

Si SPO2 Delfin Bontuyan kinsa maoy poseur buyer maoy misugat sa duha ug dihang natunol ni Bontuyan  ang kwarta gikatahong gisugo sa suspek ang bata nga ablihan ang gibitbit niining plastic container ug gipakuot gikan sa mga pellets ang giluklok nga usa ka dakong plastic pack nga may sulod nga gidudahang shabu ug gitunol kini sa suspek ngadto kang Bontuyan.

Dihang dakpon na si Tejas dali kining midagan palayo ug gibiyaan ang anak apan naabtan kini sa nigukod nga nakaposisyong mga sakop sa SOT.

Ang suspek dihang gihinabi sa mga tigbalita mitug-an nga sideline lang niya kini ug mao pa usab kini ang unang higayon nga misuway niini human gihangyo sa silingang giila lang niining si Loglog.

Samtang mihimakak kining iyang gituyo og gamit ang anak sa maong iligal nga kalihukan gumikan kay wala siya masayod sa balaod.

Matud pang Tejas nga siya igo rang namorsiyento sa matag mahaling shabu nga ipabaligya kaniya apan ang tinuoray niyang trabaho mao ang pagpaburot ug pagbuwad og putos sa chorizo.

Si Derilo sa iyang bahin mitug-an nga ang maong shabu nagkantidad og P500,000 ug kung kini mabahig sa ginagmay'ng pakete mahalin kini gikan P600,000 ngadto sa P700,000.

Kasong paglapas sa RA 9165 ug RA 7610 ang ipasaka batok sa suspek samtang ang iyang anak giturn-over na ngadto sa DSWD.