Cemvedco, magsaulog sa ika-unom nga assemblya

Ang Cebu Market Vendor's Development Cooperative (CEMVEDCO), ang nabantog nga kooperatiba nga nagbase sa merkado publiko sa Sugbu, magsaulog na usab sa ika-unom nga asembliya karong Abril 27, 2008, anha sa Cebu Grand Convention Center, Archbishop  Reyes, Cebu City. Ang tema karong tuiga mao, CONTINUED EDUCATION; "PCMRC: Progressive, Competitive Members; Realization of New Carbon.Makahuloganon ang maong tema tungod kay aduna kiniy talagsaong plastada sa kamatuo-ran nga panghitabo diha mismo sa natad sa kalihukan diin sinaksihan sa kinabag-an nga mga sakop og  publiko bisan pa man hangtod karong panahona wala pa mahaagi sa pagtagad sa atong gobyerno ang pagpalambo sa Carbon, ang pagtukod sa Unit 2 nga edipisyo nga miabot gyod og napulo kapin ka tuig ang pagpaabot ug pag-antos sa mga tindera sulod sa Carbon kay lagi naapektohan man ang pagpaninda, ilabi na nga ang atong mga kaigsoonan nga mga tindera naa na gyod sa matag daplin sa karsada mipahigayon sa ilang mga tinda, nga mao usab giisip nato nga kumpetensya dugang sa mga Department Store ug malls nga niining panahona nagabaligya usab og susamang baligya-on nato sa Carbon.

Ug luyo sa dugay nga pagpa-abot ug pag-antos wala kawad-i sa pagla-um ang mga tindera sa Carbon, mikayod  taman sa ginhawa inubanan sa pag-ampo nga unta makalahutay ug daghan pang mga katuigan ang panginabuhian nga sarang makatubag sa inadlaw  nga panginahanglan. Ug matud man, sama sa bidlisiw sa adlaw diin pagatabonan usahay sa panganod, misidlak  ug nabuhi, miuli-ot ang mga gaway nga nagapamatuod sa iyang pagtubo ug unya kalit nga mibahak-hak sa diha nga inanay nga nahanaw ang maitom nga panganod nga maoy hulga sa pagkahugno niini. Salamat kaayo nga naumol gyod ang CEMVEDCO, ang kooperatiba nga maoy gisandigan sa mga sakop niining mga tindera. Nga sa pagka karon dili malilong ang iyang pagtubo ug paglambo, nga angay panag-ingnan sa uban nga kooperatiba tungod sa talagsa-ong paglambo gani kini nakaangkon karon og kabtangan nga miabot ngadto sa singkwenta milyones sud lang sa unom ka tuig, desi-otso milyones niini ang gipanag-iya sa mga membro pinaagi sa tampo-tampo nga puhunan. Sa pagka karon aduna kini dos mil kapin ka membro nga aktibo sa kalihukan ug hayag ang mga panagway kay lagi mapasigarbohon man sa ilang pagkasakop sa CEMVEDCO nga gilantaw nga usa ka malampuson nga kooperatiba.

Apan bisan paman sa gipakita nga imahe sa CEMVEDCO ang mga opisyales niini walay hunong sa pagpangita  og paagi aron sa dugang pagpalambo ug ilabina sa ang paghangyo sa kagamhanan sa Sugbu kabahin sa katukuran sa edipisyo sa Unit 2 lakip na ang katukuran unya sa Unit 1 ug Unit 3 aron mapahimutang na sa tinuoray nga kahapsay ug kalinaw ang merkado sa Carbon ug usab panglantaw nga ang tanan nga mga tindera nga anaa sa karsada mahatagan og pwesto nga legal aron gyod mahibalik kadtong kanhi ay maayong dungog sa atong pinalanggang merkado nga mao ang CARBON.