Lalaki gitumbok nga tulisan

Nasikop nga lalaki ug nakuhaan og pusil sa gipahigayong checkpoint sa mga polis sa milabay'ng adlaw diha sa Barangay Tabunok, dakbayan sa Talisay ang gitumbok nga tulisan sa duha ka biktima sa pagpanulis.

Sila si Jennelyn Carbo 21-anyos, taga Cantonville, Barangay San Isidro sa maong dakbayan ug Maui Go, 31, taga Barangay Dumlog ang mitumbok kang Erwin Las Piñas nga mitulis kanila.

Si Carbo ang gitulis niadtong Marso 27 diha sa San Isidro  samtang si Go ang gitulis pagkasunod usab nga adlaw diha sa Barangay Poblacion.

Ang maong mga biktima ang nakuhaan sa ilang cellphone ug uban pang personal nga butang sa tawo nga nagsakay og motorsiklo.

Kahinumduman nga si Las Piñas ang nasakmitan sa iyang .22 ka kalibre nga Magnum revolver dihang wala kini makapakita og dokumento sa maong pusil.

Ang motorsiklo nga gisakyan ni Las Piñas ang naa usab sa kustodiya sa mga polis karon.

Ang hepe sa kapolisan sa dakbayan Superintendent Romeo Perigo sa pakighinabi niini sa Banat News kagahapon sa buntag nagkanayon nga gipasakaan na nila og kasong kalapasan sa Akta Republika 8294 kun “Law on Firearms, Ammunitions and Explosives”.

Si PO3 Mikie Espina sa theft and robbery section (TRS) nagkanayon nga human nila masikop si Las Piñas ilahang gitawagan ang mga biktima sa tulis ug ang nahisgutang mga biktima ang mitumbok sa suspetsado nga maoy mitulis kanila.