Naangol ang duha ka babaye ug usa ka lalaki sa dihang gipamusil gamit ang pugakhang sa ilang silingan alas 10 sa gabii niadtong miaging Domingo sa Zone Cassava, barangay Cambaro, dakbayan sa Mandaue.
Ang gipamusil mao sila si Hanna Mae Magalso, 23, Edisa Matbagon, 30, ug Jonathan Hecain, 38, pulos nagpuyo sa naasoy’ng dapit. Samtang ang namusil mao si Rodrigo Andrino, 34, piniyalan sa yuta sa usa ka Richard Ang sa Sitio Cassava, apan lumad nga taga Daanbantayan.
Si PO3 Bruce Taneo sa Opao Police Station miasoy sa Banat News nga si Andrino nagkalalis sa iyang silingan nga si Gregger Flores nga gipasanginlan niyang kanunay manglabay og bato sa iyang balay.
Mipauli si Andrino sa iyang balay, apan sa iyang pagbalik nagdala na kini og pugakhang nga iyang gipusil kang Flores.
Apan dali nga nakapasalipod si Flores hinungdan nga silang Magalso, Matbagon ug Hecain nga didto sa duol ang nangaigo sa bala sa pugakhang ni Andrino.
Human sa hitabo, nagdali unta og sibat si Andrino paingon sa Daanbantayan, apan gigukod kini sa mga sakop sa SWAT sa Mandaue ug naabtan sa flyover sa Maguikay.
Si Magalso naigo sa bolitas sa pugakhang sa iyang ulo, sa liog kang Matbagon ug sa bagtak kang Hecain.
Si Andrino gibilanggo karon sa Mandaue ug nagpaabot sa tukmang kaso nga ipasaka batok kaniya.