Mokabat sa 28 ka kahon nga adunay sulod nga mga imported cellphone ang gisakmit sa mga sakop sa Customs Sub-Port of Mactan kagahapon sa buntag.
Matod pa ni Customs Port of Mactan Collector Atty. Ernesto Urbano ang 28 ka kahon sa mga cellphone gikan sa kaulohan luwan sa abyong Cebu Pacific nga miabot mga 9:30 kagahapon sa buntag sa Mactan Cebu International Airport.
Nasuta nila ni CIIS Mactan Supervisor Franz Angelo Muñoz ug ESS Sector Commander Capt. Benjamin Capacite nga ang Bill of Lading sa maong mga kargamento nga ubos ra kaayo ang kantidad nga gideklarar tungod kay gibutang nga balor lang kini og P30 mil bisan mga cellphone ang sulod niini.
Diha sa gawas sa kahon gisuwat ang pangalan nga consignee niini mao ang Altuz Communications Inc. nga nahimutang sa barangay Paknaan dakbayan sa Mandaue apan dili kini mao ang nalatid sa Bill of Lading gumikan kay ang nasuwat nga consignee niini mao si Roilan Sumilang sa Sikto Distal Roro Transport.
Gumikan niini nagduda silang posibleng palusot kini hinungdan nga kini ilang gipugngan aron mopatim-aw ang consignee niini nga si Roilan Sumilang.
Kagahapon sa hapon wala mahinayon ang imbentaryo sa mga kahon gumikan kay usa ka nagpailang empleyado sa Altuz Communications nga si Danny Sanchez Patalinghug mikalit og tunga sa buhatan sa Customs Mactan nga wala magdala og mga dokumento nga siya tinud-anay nga empleyado sa maong kompaniya.
Matod pa ni Engr. Ben Peralta sa National Telecommunication Commission paabuton nalang nila nga dunay representante sa Altuz nga mosaksi.