Seguridad sa Tisa gi-doble

Gidoble karon ang monitoring ug pagkamabinantayon sa barangay Tisa sa siyudad sa Sugbu human sa nahitabong pagpamusil sa ilang dapit niadtong miaging adlaw.

Kini maoy gipahibawo sa kapitan sa nahisgutang barangay nga si Eduardo Cabulao, human sa duha ka insidente sa pagpamusil nga gibana-banang migintang lang og pipila ka oras.

Giangkon ni Cabulao nga naalarma sila sa nahisgutang hitabo tungod kay bag-o lang nila nga gipatuman ang curfew sa ilang barangay.

Gikatahong upat ang nabiktima sa duha ka insidente sa pagpamusil, diin giingong pulos nakamotorsiklo ang mga suspetsado.

Matud ni Cabulao nga ila nang gitugyan ngadto sa kapolisan ang pagpahigayon og dugang imbestigasyon sa maong duha ka hitabo.

Ang gimando karon sa kapitan ngadto sa iyang mga barangay tanod, nga pahugtan pa ang gihimo niining monitoring sa ilang barangay ilabi na sa mga tawo nga kadudahan og mga lihok.

“Ang akong gimando sa atong mga tanod nga alerto lang kanunay sa ilang monitoring unya mutaho dayon sa kapulisan kung dunay kadudahang mga tawo,” sumala ni Cabulao.

Nasayran nga dunay kabanay sa mga biktima ang nireklamo tungod sa giingong kapakyas pagbutang og mga polis o pagpahigayon og checkpoint sa dapit nga nahitaboan.

Dali hinoong nakapanalipod ang hepe sa kapulisan sa dakbayan nga si Sr. Supt. Patrocinio Comendador sa iyang mga sakop.

Alang kang Comendador dili mahimong mabantayan kanunay sa kapolisan ang usa ka dapit tungod usab sa kakuwang og mga polis sa siyudad.

Ingon usab niini ang gipadayag ni  Konsehal Augustus Pe Jr., ang chairman sa Committee on Public Order and Safety sa City Council.

Nasayran hinuon nga gimandoan na ni Comendador ang Punta Princesa Police Station diin nalakip sa Area of Responsibility niini ang barangay Tisa  sa pagpahigayon og dugang mga checkpoint kontra krimen.