City agriculturist apil na sa panawagan pananom lagutmon

Miapil na si Cebu City Agriculturist Julito Baclayon pag-awhag sa mga mag-uuma pagtanom sa gitawag og “survival food” sama sa mga lagutmon.

Partikular nga giawhag ni Baclayon nga mananom og mga survival food mao ang mga mag-uuma sa mga bukirang barangay sa dakbayan.

Ang pagtanom sa survival food giawhag na sa mga agriculture experts sa Pilipinas aron dunay alternatibong pagkaon ang katawhan gawas sa bugas.

Kini samtang ang nasod nakasinati  og rice crisis gawas sa naglagiting nga kainit sa panahon nga natagamtaman sa mga Pilipino.

Matud ni Baclayon nga mas maayong dili magsalig ang mga mag-uuma sa mga bukirang barangay sa siyudad sa pagtanom og mais, utanon, ingon man sa mga buwak.

Napanglantawan sa City Agriculturist nga muabot ang panahon sa tinggutom kung magpadayon ang pagsaka sa presyo sa bugas.

Gusto sa  city  agriculturist nga dunay alternatibong pananom ang mga mag-uuma gawas sa naandan niini, aron dunay ikasugakod taliwala sa nasinati karong krisis sa nasud.

Miingon hinuon si Baclayon nga wala magpabaya ang siyudad sa programang agrikultural, pinaagi usab sa gipasiugdahan niining corn-based program.

Midugang ang city  agriculturist nga ilang gilakip usab sa maong programa ang pagsal-ot  og tanom sa kamote, kamoteng kahoy, patatas, ug uban pa, diha sa kamaisan.

Nasayran hinuon sa Banat News nga nakaangkon og pagsaway ang maong sugyot sa mga agricultural experts gikan sa pipila ka kabus nga mga molupyo.

Kini tungod kay alang kanila, dili kini maoy tukmang solusyon pagtubag sa rice crisis nga nasinati karon sa tibuok kapupud-an.

Ilang sugyot nga tabangan sa kagamhanan ang mga mag-uuma aron molambo ang food production ug dili na maglisod ang nasud sa suplay sa bugas.