Kawasan Falls paninduton para sa turista

Giumol sa Kapitolyo ang usa ka Technical Working Group (TWG) nga maoy gitahasan sa pag-umol sa Kawasan Falls Eco-Tourism development plan didto sa lungsod sa Badian.

Ang maong grupo gilangkoban ni Gobernador Gwendolyn Garcia, isip chairman ug sa ubang miyembro sa Hunta Probinsyal nga sila si Bokal Agnes Magpale, chairman sa Committee on Tourism, bokal Peter John Calderon, Chairman sa Committee on laws, bokal Weng Gakit, chairman sa committee on commerce and trade ug mismo ang mayor sa Badian nga si Carmencita Lumain.

Ang maong technical group maoy motuon pagpalambo sa Kawasan Falls, kinsa kanunay dagsaan sa mga langyaw'ng turista ingon man ang lokal ilabi na kung dunay mga okasyon ang katawhan.

Mapaabot sa katawhan nga dunay dakong kausaban ang Kawasan Falls ug mosamot ang kaanindot sa palibot sa higayon nga kasugdan  na ang pagpalambo sa mga sakop sa Technical Working Group.

Gipaabot usab nga mas mosamot kadaghan  ang  mga langyaw  nga mobisita sa Kawasan kung duna na unyay laing kalingawan nga makita diha sa palibot gawas sa pagpangaligo sa tubig.