Nisulong maoy natigbasan

Usa ka 20 anyos nga lalaki ang nalandig sa Cebu City Medical Center (CCMC) human matigbasi gumikan sa  pagsulong sa panimalay sa iyang uyoan kagahapon sa kaadlawon diha sa Sitio Bayong barangay Tisa ning dakbayan.

Ang natigbasan mao si Jefford Ruiz Sacay,  way trabaho samtang ang nakatigbas niini mao ang iyang uyoan nga si Eddie Ruiz,  60, ug residente  sa nahisgutang lugar.

Si Sacay nga nakaangkon og samad tinigbasan sa iyang tuo ug walang bukton gidala sa     mobile patrol Car 016   sa Cebu City Medical Center.

Sa imbestigasyon nila ni SPO1 Rogelio Nedamo ug mga kaubanan sa Homicide sa Cebu City Police Office ang uyoan nga nakatigbas nisaysay nga mga ala 1:30 kagahapon sa kaadlawon nangatulog pa sila uban sa iyang mga anak.

Sa kalit lang nga   nisulod  ang suspek sa ilang panimalay uban sa duha ka wala mailhing kauban  nga  nisaka  usab sa atop apan sa  iyang pagsusi kalit lang  siyang gibugno sa pag-umangkon hinungdan nga  iya kining natigbasan. Apan nailog ni Sacay ang sundang hinungdan nga milayat sa biktima si Ruiz ug nangayo og tabang. Apan gipusil siya  makadaghang higayon sa mga kauban ni Sacay apan wala siya maigo.