Usa ka turistang Belgian national ang nabiktima sa mangunguot ug midangop sa Theft and Robbery Section sa Cebu City Police Office human gikuotan sa iyang kwarta kagahapon sa alas 4:00 sa kaadlawon diha sa Perpetual Soccour St., barangay Kamputhaw ning dakbayan.
Ang biktima giila nga si Thierry Allegaert, 44, nga taga Berchem, Belgium ug kasamtangan nagpuyo sa usa sa mga hotel sa downtown ning dakbayan.
Samtang ang suspetsadong babaye giila lang sa pangalan nga “Alma” nga nagpangidaron sa 30 anyos, 5'2 ang gitas-on, gamayon ang panglawas, ug taas ang buhok.
Ang biktima nakuhaan sa iyang blue nga pitaka nga adunay sulod nga 650 Euro nga mokantidad sa 42 mil kapin ka pesos.
Ang biktima niasoy sa kapulisan nga kagahapon sa kaadlawon nga ang maong suspetsado nakiglambing-lambing kaniya ug nagpakaaron ingnon nga iyang higala.
Sumala pa niini nga dihang naglakaw na sila sa dalan nga naglambing-lambing gikuot na diay ang iyang sling bag ug gikuha ang iyang pitaka.
Human sa pagkuha ang suspetsado nilakaw gilayon paingon sa usa ka inilang mall ning dakbayan samtang ang biktima igo nalang nagpa-blotter sa TRS.