Mayor sa Tudela gi-ambus

Mayor sa lungsod sa Tudela gi-ambush apan ang giingong personal bodyguard niini maoy naigo samtang luwas hinuon si Tudela mayor Rogelio Bacquerfo Sr. ug asawa niini nga si Nanette human sa insidente diha sa barangay Puertobello alas 7:00 pasado sa nilabay'ng gabii.

Naigo diha sa nawong si Celso Cuizon, 51 anyos lumad nga taga barangay Looc siyudad sa Danao ug job order nga kawani sa Munisipyo sa Tudela isip “lookout” sa mayor sa mga problema sa lungsod.

Subay sa imbestigasyun sa kapulisan si Bacquerfo maoy pinasidunggang dinapit sa graduation diha sa Puertobello National High School covered court ug padulong na sila sa usa ka salo-salo dihang nahitabo ang pagpamusil.

Gikatahong mao pay pagsakay sa mayor, asawa niini sa service van nga gimaneho ni Juan dela Paz ug paingon na untang isirado ni Cuizon ang van dihang kalit lang nipaka ang usa ka buto sa armas.

Si Bacquerfo diha sa front seat tupad sa driver samtang si Cuizon diha sa luyo tupad usab sa asawa sa mayor.

Gikatahong nakasinggit pa si Cuizon sa mayor og “mayor hupo kay dunay namusil,” ug nasundan kini dayon og “ igo ko mayor” ning tungura gikatahong gimando dayon ni Bacquerfo nga padaganon ang sakyanan lahos ngadto sa San Francisco District Hospital ug luwas na ang kahimtang.

Si Cuizon natapsingan diha sa tuong bahin sa nawong.

Si Bacquerfo nipadayag sa mga tigbalita sa radyo nga siya gyud ang tuyo sa maong pagpamusil ug mihingalan sa suspek nga anak sa naparot nga kapitan sa barangay.

Wala usab niya angkona nga iyang bodyguard si Cuizon kundili maoy iyang ‘lookout’ sa mga problema sa lungsod samtang naglaraw karon ang mayor nga mokuha og bodyguard.

Giinsister ni Bacquerfo nga politika gyud ang hinungdan sa maong pagsuway pagpatay kaniya. Matud pa sa mayor duna siya’y mga testigos nga magtumbok sa suspek.

Gitug-an sab ni Baquerfo nga ang suspek pinangita sa Ormoc City nga naila sa pangalan nga si Marlito Montero Jr., nga lumad nga taga Tudela ug anak sa naparot nga barangay kapitan sa nahisgutang barangay.

Apan si Sr. Supt. Carmelo Valmoria, director sa Cebu Provincial Police Office midumili sa paghingalan sa suspek sanglit nagpadayon pa ang ilang imbestigasyon ug dili usab motuong ang mayor ang target niini.

“We already identified the suspect but we could not disclose it yet until we get statements from the witnesses we know many saw it because the place is well lighted,” asoy pang Valmoria.

Matud ni Valmoria dili gyud si Bacquerfo ang tuyo tungod kay daan ng nagpaabot ang gunman diha sa programa ug posibleng naniid kini kung asa milingkod ang mayor ug ang ikaduha usa ra pud ka bala ang gigamit.

“The assailant’s target is really Cuizon. We are still trying to establish the motive. We believed the suspect was already been there during the program, otherwise it could have been a good shot,” asoy pang Valmoria.

Ang higpit nga kaatbang ni Bacquerfo nga si kanhi mayor Demetrio Granada nagdumili lang una pagluwat og komentaryo tungod kay gusto una niya nga matino ang kinatibuk-ang detalye sa insidente.

Giangkon ni Granada nga nasayran ra niya ang hitabo tungod sa text message nga nagpahibalo sa nahitabo ug gisabot usab niini ang pagduda ni Bacquerfo nga politika ang motibo niini sanglit katungod kini sa mayor.

Nasayran nga ang suspek mao ang usa sa mga gikulata sa mga kabanay ni Bacquerfo niadtong milabay'ng buwan diin gisunog hasta ang mga pumpboat ug gilabayan usab sila og Granada.

Matud pang Valmoria wala mokooperar ang mga nabiktima sa maong insidente ug walay kasong napasaka.