Lalaking piyansado gipatay sa Carcar

Gipusil patay sa wala pa mailhi nga mga suspek ang usa ka lalaki nga nag-atubang usab og kasong pagpatay sa dakbayan sa Carcar niadtong Lunes sa alas 10:20 sa gabii.

Ang biktima giila sa kapulisan nga si Joey Matadero, 36, ug nagpuyo sa P. Burgos St., Poblacion-II syudad sa Carcar.

Nasayran gikan ni P03 Dante Ramas sa Carcar City Police Station dihang nahinabi sa Banat News nga ang biktima nag-atubang usab og kasong homicide sa sala ni Regional trial Court RTC Branch 10 Judge Soliver Perras apan temporaryong gawasnon human nakabutang og pyansa.

Ang biktima naka-angkon og duha ka samad pinusilan sa iyang nawong ug sa bukobuko niini.

Subay sa inisyal nga imbestigasyon sa kapulisan ang biktima naglakaw kini paingon na untang mopauli sa ilang pinuy-anan gikan sa pinuy-anan sa iyang higala nga usa ka Jun Emperio.

Apan paghiabot niini sa sitio Tapon barangay Poblacion-III kalit lang kining giduol sa duha ka wala mailhing mga suspek ug gidul-itan sa pagpusil sa duha ka higayon.