Mayor sa Ronda buot mobutang og outpost sa bukiran

Mohangyo si Mayor Esteban Sia sa lungsod sa Ronda, Cebu ngadto ni Cebu Provincial Police Office Chief (CPPO)  Sr. Supt. Carmelo Valmoria nga butangan og mga police outpost ang mga bukirang barangay sa ilang lungsod.

Kini aron mahunong na ang sigeng pinusilay sa ilang lungsod sugod niadtong bulan sa Nobiyembre sa milabay'ng tuig diin ang bodyguard sa mayor ang gipusil patay.

Giangkon sa mayor nga gihasolan na siya sa sigeng pinusilay sa ilang lungsod kinsa iyang gituuhan nga gimugna sa armadong grupo nga nagbase sa bukirang barangay sa lungsod.

Nagtuo si Sia nga kung mabutangan na og police outpost ang kabukiran sa ilang lugar  mahunong na ang sigeng pagpamusil sa lungsod.

Hinuon giangkon  ni  Valmoria kagahapon atol sa press conference nga nakadawat siya'g suwat sa mayor kabahin sa gihangyo niini.

Apan iyang gitataw nga dili siya makahatag og police outpost tungod sa kakuwang sa CPPO og police personnel.

Matud ni Valmoria nga iyang patrolyahan sa mga sakop sa Provincial Mobile Group ang mga lugar sa kabukiran sa nahisgutang lungsod.

Gihangyo ni Valmoria ang publiko sa maong lungsod nga mokooperar sa kapolisan pagsumbong kun dunay mga tawo nga makit-an ug kadudahan ang linihokan.

“Nobody come out, we need the cooperation of the public, kay nikalit lang og taas ang kremin sa maong lungsod,” dugang pang Valmoria.

Gibutyag niini, nga ila nalang gipaabot nga molusot ang warrant of arrest sa pagpusil patay sa bodyguard sa mayor ug sa testigos niini sanglit ila naman nga nailhan base sa mga nakasaksi.

Giklaro niya nga ang mga nahitabo nga pinusilay diha sa maong lungsod sa nangaging pipila ka semana walay kalambigitan ang politika.